МАХН-ын Гүйцэтгэх товчооны хурал тарж, Бага чуулганы хуралдаан үргэлжилж байна. Гүйцэтгэх товчооны хурлаас 2017 оны Ерөнхийлөгчийн согуульд оролцох эсэхээ хэлэлцжээ. Ерөнхийлөгчийн сонгуульд нэр дэвшүүлэхээр дөрвөн хүнийг сонгосон гэх мэдээлэл байгаа юм.

Тодруулбал, Шадар сайд асан Ц.Оюунбаатар, Монгол Улсын гавьяат хуульч Ц.Шаравдорж, УИХ-ын гишүүн асан С.Ганбаатар, “Насны зам” компанийн захирал Ж.Энхжаргал нарын нэр дээр санал хурааж, тус намаас Ерөнхийлөгчийн сонгуульд нэр дэвшигчийг тодруулахаар болжээ. Гэхдээ албан бус эх сурвалжийн мэдээллээр бол МАХН Ерөнхийлөгчийн сонгуульд оролцохгүй ч байж мэдэхээр байгаа аж.

Учир нь тус намаас Ерөнхийлөгчийн сонгуульд нэрээ дэвшүүлэх хүн бүх зардлаа өөрөө гаргаж, намдаа хандив өгөх ёстой юм байна. Тиймээс зарим хүн ийм өндөр ачааллыг даах гишүүн тус намд байхгүй гэж үзэж буй бололтой. Юутай ч албан ёсоор МАХН-ын Бага чуулган хуралдсаар л байна. Албан ёсны шийдвэр хараахан гараагүй бөгөөд нэг цаг орчмын дараа мэдээлэл тодорхой болно хэмээж байгаа юм. Хэрвээ МАХН энэ удаад оролцохгүй гэж шийдвэр гаргавал АН-ын нэр дэвшигчийг дэмжих магадлал өндөр байгаа билээ.

Г.ГАНЧИМЭГ