Украины Засгийн газар ОХУ-ын интернэт сайт “ВКонтакте”, хайлтын  “Yandex” зэрэг сайтуудыг хаах арга хэмжээ авч эхэлжээ. Тус улсын Ерөнхийлөгч Петро Порошенко энэхүү арга хэмжээг авах тухай зарлигт энэ сарын 15-ны өдөр гарын үсэг зурсан байна.

ОХУ-ын сайтуудыг хаах нь Украины хямралтай холбоотойгоор ОХУ-ын эсрэг авч буй хориг арга хэмжээний нэг хэсэг аж.  Орон нутгийн зарим хэвлэлд мэдээлснээр, тус арга хэмжээ гурван жил үргэлжлэх юм байна.

“ВКонтакте” сайт нь ОХУ-ын фэйсбүүк гэж нэрлэгддэг бөгөөд хуучин Зөвлөлт холбоот улсын бүрэлдэхүүнд багтаж байсан улс, орны иргэд ихэвчлэн ашигладаг байна. Тус нийгмийн сүлжээний сайт Украинд хамгийн их хандалттай байдаг бол  “Yandex” ч гэсэн тус улсад “Google”-ын дараа орох хэмжээний олон хэрэглэгчидтэй юм байна.