Монголбанк энэ оны 9 дүгээр сарын 25-ны байдлаар 13.5 тонн алт худалдан аваад байна. Монгол Улсын Засгийн газраас "Алт-2" хөтөлбөрийг хэрэгжүүлж байгаагийн хүрээнд тус банкнаас "Монгол алт" аяныг зохион байгуулж байгаа билээ. Цаг уурын нөхцлөөс шалтгаалан 8,9,10 дугаар сард иргэд аж ахуйн нэгж алт тушаах нь нэмэгддэг. Тэгвэл энэхүү аяны хүрээнд Монголбанкинд алт тушаасан харилцагчдад "Гэрчлэх бичиг" гардуулж, орон нутаг дахь алт олборлогч иргэн, компанид алт худалдан авах үйл ажиллагааг сурталчлан таниулах сургалтыг зохион байгуулж байна.

Монголбанк нь Монгол Улсын валютын гадаад нөөцийг нэмэгдүүлэх, зохицуулах зорилгоор байгууллага, иргэдээс алтыг худалдан авч, гадаадад цэвэршүүлдэг. Худалдан авсан алтаа олон улсын жишигт хүргэн цэвэршүүлээд гадаад валютаар борлуулахад бэлэн болгож олон улсын санхүүгийн байгууллагуудад хадгалуулдаг.

Энэхүү мөнгөжсөн алт нь Монгол Улсын мөнгөн тэмдэгтийн тогтвортой байдлыг хангах, эдийн засагт үүсэх эрсдэлийг бууруулах баталгаа болдог юм.