Орхон аймгийн чиглэлд Хөшөөтийн даваанд халтиргаа гулгаа үүссэн байна. Мөн цас их хэмжээгээр орж үзэгдэх орчин хязгаарлагдмал болж байгаа тул зам хаах төлөвтэй байна. Онцын шаардлагагүй бол энэ чиглэлд зорчихгүй байхыг анхааруулж байна. Тус аймгийн Засаг дарга болон онцгойгийнхон замын нөхцөл байдлыг одоо шалгаж байгаа юм байна. Мөн өвлийн дугуйгүй жижиг тэрэгнүүдийг явахыг хориглож байгаа аж. Аймгийн Онцгой байдлын газраас автогридерүүд гарган, цасыг цэвэрлэж байгаа тул Хөшөөтийн давааны замыг түр хаагаад байгаа гэнэ.

Цаг уур орчны шинжилгээний газраас энэ сарын 13-нд нутгийн зүүн хагаст, 16-нд баруун болон төвийн аймгуудын нутаг, зүүн аймгуудын нутгийн хойд хэсгээр цас, 14-нд Хангай, Хөвсгөлийн уулсаар, 15-нд зарим газраар бага зэргийн цас орж, цасан шуурга шуурна.  Салхи 13-нд говь, талын нутгаар, 14-16-нд зарим газраар секундэд 14-16 метр хүрч ширүүснэ гэсэн мэдээ өглөө. Мөн Хөвсгөл, Булганы чиглэлд ч гэсэн дээрхтэй адил нөхцөл байдалтай байгааг сэрэмжлүүлж байна.