Төр эрхэмсэг байх учиртай. Төрийн хүн нуруутай бас үлгэр дуурайлалтай байх ёстой. Эртнээс нааш ичих нүүртэй, бахархах түүхтэй Монгол төрийн нүүр царай ухаангүй, урагшгүй заримаас болж шалаар нэг хөглөрч байна. Хөглөрөх хөглөрөхдөө хүмүүний ёсны ичгүүр сонжуурын туйл болсон эм эмийн ичимдэг, нуудагтай холбоотой асуудлаар ард иргэдийнхээ аманд багтаж, аль муугаараа хэлүүлэх болов.

Энэ том хэргийн “гол баатар” бандааш хэмээх алдрыг зүүгээд буй Монгол төрийн хамгийн залуу түшээ Д.Гантулгатай холбоотой хүчингийн хэрэг. Төрийн ордонд “Би бандаашаа өмсөөд гарсан” гэх ичгүүргүй мэдэгдлийг ямар ч эмзэглэлгүйгээр хэлж суусан энэ залуу өнөөдөр юу бодож явдаг юм. Хийсэн хэргээ хаацайлж тохиролцсон, ярилцсан, тэгээд үйлдсэн гэх гутамшигтай гэхэд даанч гутмаар үгийг хээв нэг хэлж суугаа нь түүнийг төрд тэнцэхгүй нэгэн гэдгийг тодхон хэлж байгаа юм.

“Хэргийн мөрдөн шалгах ажиллагааны явцад цугларсан нотлох баримтад тулгуурлан УИХ-ын гишүүн Д.Гантулгыг Эрүүгийн хуулийн тусгай ангийн холбогдох зүйл хэсгээр эрүүгийн хэрэг үүсгэж, яллагдагчаар татсан байгаа. Түүнд яллагдагчаар татсан тогтоолыг танилцуулахаар мөрдөгч болон прокуророос хэд хэдэн удаа дуудсан боловч эрхэм гишүүн орон нутаг, гадаадад ажилтай байгаа нэрийдлээр одоог хүртэл ирээгүй байна” гэх албаны хүний яриа хэвлэлээр нэг цацагдаад байхад ч “улайхгүй” сууж байгаа түүнийг шууд баривчилбал яасан юм бэ.

УИХ-ын гишүүний алдраар халхавч хийж адгуусны авир гаргачихаад хийсэн хэргээсээ мултрах гээд аль байдгаараа зүтгэж байгаа түүнийг төрийн төмөр нударга үзүүлж барьж аваад “байвал зохих газар”-т хийчихвэл арай шударга байх юм биш үү.  

Залууст, дараа дараагийн төрийн түшээдэд сургамж болох үүднээс түүнийг сайтар шалгаж, өөрөө дуудсан үед нь очоод шалгуулж чаддаггүй бол барьж аваад хорьсон ч ер нь яадаг юм. Хайран ч төрийн нэр хүнд, залуусын ирээдүй.