Эдийн засаг  хямарч байна. Улс орон хэцүүдлээ. Иргэдийн амьдрал улам дордсон гэх бүрхэг мэдээлэл нийгмийн дийлэнх хэсгийг нөмрөөд байгаа билээ. Гэвч эдийн засагчид өөрөөр тайлбарлаж байна. Тодруулбал, эдийн засгийн өнөөгийн байдал сэдэвт эдийн засагчдын уулзалт хэдхэн хоногийн өмнө болсон билээ. Энэ үеэр эдийн засагчид өөр өөрийн байр суурийг өөр өөр өнцгөөс тайлбарлаж байв.

Тэдний олонхи нь Эдийн засгийн байдал 2012 оны хямралтай үетэй харьцуулахад эдийн засаг сэргэж байна. Тэр үетэй харьцуулахад одоогийн нөхцөл байдал хямрал биш хэмээн үзэж буйгаа илэрхийлсэн.

Эдийн засагчдын хэлж буйгаар зөв гарц гаргалгааг олж, зөв чиглүүлж чадвал бидэнд эдийн засгийн хувьд өшөө их боломж ч байгаа. Цаашид эдийн засаг улам сэргэх боломж байгаа гэлээ.

ОУВС, Дэлхийн банк гээд гадаадын судалгаанаас эхлээд үндэсний статистикийн хорооны судалгаанаас нь эдийн засгийн өсөлтүүдийг харж болох талаар зарим эдийн засагчид дурдаад авна билээ.

Эдийн засаг сэргэж байна гээд тайвшрах бус улам хичээж, дан ганц уул уурхай гэлтгүй жижиг дунд бизнес эрхлэгчид рүүгээ чиглэсэн бодлого,  хөдөө аж ахуй, газар тариалангаа дэмжих төрийн бодлогыг цогцоор нь авч үзэх цаг болсныг эдийн засагчид байнга сануулдаг, сануулсаар байгаа билээ.

Дуусашгүй баялаг гэж үгүй. Байгалийн баялаг хэзээ нэгэн цагт дуусч барагдах учир эдийн засгийн дараагийн хөшүүргээ уул уурхайтайгаа хамтатган хөгжүүлж, төрөөс бодлогоор дэмжих ёстойг эдийн засагчид дахин санууллаа.