Степпе паблишингаас эрхлэн хэвлүүлсэн, МУИС-ийн профессор, Макс Планкийн нийгмийн антропологийн хүрээлэнгийн ахлах судлаач Л.Мөнх-Эрдэнийн “Тэргүүнгүй төр” ном өчигдрөөс худалдаанд гарлаа. Энэхүү улс төр, үндэстний асуудал, дээд боловсролын талаар бичсэн сонирхолтой номыг МУИС-ийн пресс номын дэлгүүрээс худалдан авч уншаарай.

Энэ номын өмнөтгөлд “...Тэргүүнгүй төр” ба залгамж нийтлэлүүд хэвлэгдээд удаагүй байхад Ерөнхийлөгч Ерөнхий сайдын дайн Ерөнхийлөгчийнхөөр шувтарч, Ерөнхийлөгч өөрийн засгийн газрaa байгуулсан ч, Ерөнхий сайдын эсрэг түүнтэй эвсэж асан УИХ-ын дарга “төрийн гурван өндөрлөг”-ийн нэг гэдгээ тод харуулж, төр засгийг УИХ-ын даргын байр сууринаас удирдахыг оролдож, Засгийн газрыг Ерөнхийлөгчтэй булаацалдсаар сонгуультай золгосон юм.

Харин халаа авсан шинэ дарга УИХ-ын даргын суурин дээрээс улс төрийг ноёлж болохыг харуулж Монголын төр үнэхээр л “гурван өндөрлөгтэй”, триумвират маягийн, тийм ч учраас “тэргүүнгүй төр” гэдгийг дахин давхар нотлов. Тийм ч учир энэ номыг Тэргүүнгүй төр гэж нэрлэхээр шийдсэн билээ...хэмээн өгүүлжээ.