Улс төр угаасаа л байнгын халуун сэдэвтэй байдаг хойно бужигнасаар л байна. Гэхдээ энэ удаагийнх арай өөр. “Гал” МАН дотор асч, унтарч амжихгүй “цог” нь хүн бүр рүү үсэрч байна. Улс төрийн ууган хүчин, туршлагатай нам гэгдэх МАН-ынхан энэ удаа Засгийн газар, УИХ-тайгаа “унах” нь бараг тодорхой болж байх шиг ээ.

ЖДҮХС-аас зээл авсан улстөрчдийн нэрсийн жагсаалт нэлээн хэдэн өдрийн өмнө олон нийтийн сүлжээнд ил болж цөөн хэдэн гишүүний нэр яригдаж байсан бол одоо энэ жагсаалт улам урт үргэлжилж, зах замбараагаа алдав. Үүнд эгдүүцсэн ард иргэд 2016 оны УИХ-ын сонгуулиар 65 тойрогт МАН-ын төлөөллийг илгээж, асар их итгэл өгсөндөө харамсч буйгаа олон нийтийн сүлжээнд илэрхийлж байна.

Харин үүнд цочирдсон МАН-ынхан өнөөх тамын тогооны үлгэр шиг тоос тортогноос өөрөө цэвэр гарч байвал намын нэр хүнд ч өнгөрсөн гээд нам дотроо “алалцаж” эхлэв.

Учир нь МАН-ын бүлгийн дарга Д.Хаянхярваа өчигдөр сэтгүүлчдэд мэдээлэл хийж /Мэдээллийг манай сайт бүрэн эхээр нь оруулсан /, УИХ-ын дарга М.Энхболд болон МАН-ын дарга, Ерөнхий сайд У.Хүрэлсүх нарыг ЖДҮХС-гаас зээл авсан гишүүдэд хариуцлага тооцох тухай хүсэлт хүргүүлсэн тухайгаа мэдэгдсэн.

Тэгвэл нөгөө талдаа МАН-ын дарга У.Хүрэлсүх нам дотроо шударга ёсыг тогтоож, “баатар” болох оролдлого хийж эхэлсэн бололтой. Тэрбээр УИХ-ын дарга М.Энхболд, Хотын дарга Су.Батболд, МАН-ын бүлгийн дарга Д.Хаянхярваа нараас хариуцлага нэхэж, албан тушаалаас нь огцруулна гэв.

Ийнхүү МАН-ын Удирдах зөвлөлийн хуралдаанаас Д.Хаянхярваа, С.Батболд нарыг огцруулахыг дэмжиж, М.Энхболдыг бүлгээр хэлэлцэхээр болсон юм. Харин намынхаа гишүүдийн хууль бус бүхний халхавч болон хариуцлага үүрч байгаа дээрх гурван эрхэм намынхаа УЗ-ийн хурал дээр ийн ярьжээ.

Хотын дарга С.Батболд, миний хувьд 2.5 жилийн турш хотыг хөгжүүлэхийн төлөө чадахаараа зүтгэлээ. Миний бие 30 жилд төрд ажиллахдаа хулгай хийгээгүй, төрийн мөнгөнд гар дүрээгүй гэдгээ бардам хэлье. Харин ч хотын дарга гэдэг энэ ажлыг авсанаас хойш долоо хоног бүрийн пүрэв гарагт над руу довтолсон, миний нэр хүндийг унагаах гэсэн, сүүлдээ бүр гутаан доромжилсон мэдээллийг зориудаар түгэээж, тараадаг болсон. Ийм ажил хийсэн хүмүүс үнэхээр уйгагүй байсныг 2.5 жил тасралтгүй ажилласанаас хэн ч хараад мэдэхээр байгаа. Нэр хаяггүй энэ цахим хуудсуудыг хуулийн байгууллагаар шалгуулахад бүгд МАН-ын байрнаас байсан юм шүү. Суудалтайгаа би зууралдахгүй ч эхлүүлсэн ажлаа дуусгах нь нийслэлчүүдийн өмнө хүлээсэн үүрэг гэж бодож байна…

Харин Д.Хаянхярваа, Биднийг 60 тэрбумынхан гэж үзэж ажлаа өгөхийг хүсч байгаа юм байна. Тэгвэл 65 тэрбум төгрөг ЖДҮ сангаас бодитойгоор аваад идчихсэн гишүүдэд хэн хариуцлага тооцох вэ. Би ажлаа өгөхэд бэлэн. Ингэлээ гээд чиний засгийн сайд нарын хулгай дарагдахгүй шүү Хүрэлсүх ээ...

УИХын дарга М. Энхболд, би МАН-ыг сөрөг хүчнээс эрх баригч болгосон. Надад ажлаа өгөх шалтаг шалтгаан байхгүй. Би хууль зөрчөөгүй. Мөн төрийн тогтвортой байдлын төлөө тууштай ажилласан. Хэрэгтэй цаг үед зугтчихаад, эрх баригч болохоор дарга болоод даналзах шаардлага байхгүй шүү…

Тэд байр сууриа ийн илэрхийлсэн. Олон нийт энэ гуравт өөрсдөд нь “но” бий гэхдээ зөвхөн энэ гурваар зогсох учиргүй. Энэ гурвыг албан тушаалаас нь буулгалаа гээд бусад нь уснаас хуурай гарах учиргүй. М.Энхболд, Су.Батболд, Д.Хаянхярваа нарын ард халхлагдан цэвэр үлдсэн нөхдөд ч хариуцлага үүрүүлэх  учиртай. У.Хүрэлсүх өөрөө ч огцрох ёстой. Засгийн газар, УИХ-ыг бүхэлд нь огцруул гэх байр суурийг илэрхийлж байна.

Ард түмнийг доромжилдог төрийн түшээдийн доромжлол хэрээс хэтэрч, ард түмний тэвчээр туйлдаа хүрснийг энэ удаагийн ЖДҮХС-гийн хөрөнгөтэй холбоотой асуудал харуулж байна. УИХ-ын 50-60 гишүүн нь гэмт хэрэгт холбогдоод байгаа хойно энэ УИХ тарахаас өөр гарцгүй ээ. Ерөнхий прокурор ч хэлсэн биз дээ. Өөрсдөөсөө эхэл, хариуцлага хүлээ гэж.

Гэхдээ нэг засаг унаад асуудал сайжрахгүй нь тодорхой. Тогтолцоог нь өөрчлөхгүй бол. "Шүдгүй арслан"-гуудаа өөрчлөх цаг болжээ. Гурван том "шүдгүй арслан" байгаа нь үнэн байх .