Ойрын өдрүүдэд улс төр бужигнаж, мөн халуухан үйл явдлууд ар араасаа өрнөсөөр байна.  Тодруулбал, МАН-ын бүлгийн дарга Д.Хаянхярваа “УИХ-ын дарга М.Энхболд болон МАН-ын дарга, Ерөнхий сайд У.Хүрэлсүх нарыг ЖДҮХС-гаас зээл авсан гишүүдэд хариуцлага тооцох тухай хүсэлт хүргүүлсэн” тухайгаа хэвлэлээр дамжуулан олон нийтэд мэдэгдсэн.

Гэтэл тун удалгүй МАН-ын Удирдах зөвлөл хуралдаж, Д.Хаянхярвааг МАН-ын бүлгийн даргаас огцруулах асуудлыг хэлэлцэж, гишүүдийн олонхи дэмжсэн. Тэгвэл өчигдөр тус намын бүлэг хуралдаж түүнийг Бүлгийн даргаас нь огцруулчихлаа.

Тэгвэл уржигдар болсон МАН-ын Удирдах зөвлөлийн хурлаас Д.Хаянхярваа гишүүн бараг уйлах шахуу гарч ирсэн талаар эх сурвалжууд хэлж байгаа юм. Тэрбээр “Өнгөрсөн хугацаанд намайг хэрхэн ажилласныг бүлгийн хамт олон илүүтэй дүгнэх байх. Зарчим ярьж болохгүй цаг ирчихсэн юм байна. Хүний алдааг оноог ярьж болдоггүй болчихсон юм байна.

Мөн хууль дүрэм хэрэгжихэд хэцүү болсон юм байна гэж харж байна. Цаашид би өөрийн дуу хоолойгоо хязгаарлуулахгүй. Яагаад гэвэл ард түмний талд дуугарах ёстой. Түүнээс биш намын эрх ашиг, бүлэглэлийн эрх ашгийн төлөө дуугарахгүй ёсгүй” хэмээн байр сууриа илэрхийлжээ.

Хариуцлагагүй, хууль бус үйлдэлд нь олон нийтэд зарлагдсан ангийн нөхдийнхөө өмнөөс хамгийн түрүүнд хариуцлага хүлээсэн нь Д.Хаянхярваа гишүүн учраас түүний араас албан тушаалаасаа огцрох олон хүн бий. Тиймээс уйлах хэрэггүй дээ, Д.Хаянхярваа гишүүн ээ. Таны явсан замаар олон олон хүн явна” гэж хэлмээр санагдав.

Өчигдрийн МАН-ын бүлгийн дүр зургаас харахад МАН яг тэнцүү хуваагдан тулалдаж байгаа юм байна. Д.Хаянхярвааг унагах санал хураалт 29:29-өөр тэнцсэн. Д.Хаянхярваа унах бол яршиг л байна. Бүлгийн дарга гэгч хурал удирдагч. Гэвч түүнийг унагах санал хураалтаас МАН яг тэг дундуураа хуваагдах цаг нь ирсэн нь илт байна.