Галт зэвсэг эзэмшдэг аливаа нэг аж ахуйн нэгж, байгууллага эсвэл хувь хүн танд хэрэгтэй нэгэн мэдээллийг дуулгая. Үүнийг та мэдэхгүй хэрнээ мэддэг ч юм шиг өнгөрч, мэддэг хэрнээ биелүүлдэггүй байж болох юм. Тиймээс энэ талаар дэлгэрэнгүй мэдээллийг хүргэе.

Юуны түрүүнд танаас “Таны мэдэлд худалдаж авсан, эсвэл өвөө ааваас тань уламжлагдан ирсэн, бүртгэлгүй ямар нэгэн галт зэвсэг байгаа юу” гэж асууя. Хэрвээ тийм бол танд галт зэвсэг болон түүнтэй адилтгах хэрэгслээ бүртгэлжүүлэх боломж нээлттэй байгааг та сонсоогүй, дуулаагүй өнгөрчихөж байгаа юм биш биз.

Тодруулбал, Цагдаагийн байгууллагаас иргэн, хуулийн этгээдийн урьд өмнө бүртгэгдсэн болон бүртгэлд хамрагдаж байгаагүй эх сурвалж нь тодорхойгүй галт зэвсэг, түүнтэй адилтгах хэрэгслийг ямар нэгэн хуулийн хариуцлага хүлээлгэхгүйгээр бүртгэж, гэрчилгээжүүлэх аяныг зохион байгуулж байна. Иймд иргэн хуулийн этгээд та өөрийн оршин суугаа нутаг дэвсгэрийнхээ цагдаагийн байгууллагад хандаж, галт зэвсэг болон түүнтэй адилтгах хэрэгслээ бүртгэлжүүлэхийг уриалж байна.Ингэхийн тулд:

• Хүсэлт гаргасан өргөдөл
• Иргэний үнэмлэхний хуулбар
• Оршин суугаа баг, хорооны Засаг даргын тодорхойлолт
• Цээж зураг /3 хувь/
• Галт зэвсгийн нэр, төрөл, үйлдвэрлэсэн он, дугаарыг тодорхойлсон баримт бичиг
• Улсын тэмдэгтийн хураамж төлсөн баримт
• Өмчлөх галт зэвсгийн хонгио, хошууны дээжийг шүүхийн шинжилгээний байгууллагын мэдээллийн санд бүртгүүлсэн тухай тодорхойлолт
• Галт зэвсэг эзэмшин, ашиглах, хадгалах аюулгүй ажиллагааны сургалтад хамрагдсан гэрчилгээ, эрүүл мэндийн хуудас зэргийг авч очиход болно.
• Галт зэвсгийн тухай хуульд зааснаар иргэн нь галт зэвсгээр гэмт хэрэг санаатай үйлдэж, ял эдэлж байгаагүй талаарх тодорхойлолтыг цагдаагийн байгууллага гаргана.

Хэрвээ та заагдсан хугацаанд галт зэвсгээ бүртгэлд хамруулаагүй тохиолдолд Зөрчлийн хуулийн 5дугаар зүйлд зааснаар иргэнийг 40 нэгжтэй тэмцэх, хуулийн этгээдийг 400 нэгжтэй тэнцэх төгрөгөөр торгож, хуулийн хариуцлага хүлээлгэх аж. Та заавал торгуулах албагүй шүү дээ.

Харин ч эсрэгээрээ галт зэвсгээ бүртгэлжүүлж, гэрчилгээтэй болгочихоод багахан хэмжээний татварыг жилд ганцхан удаа төлөөд хуулийн дагуу галт зэвсгээ эзэмших боломжтой танд байгааг сануулъя. Энэ төрлийн татварыг хууль сахиулах албаны болон байлдааны /зэвсэгт хүчин, хил хамгаалах, тагнуулын байгууллагын/ зориулалттай галт зэвсгүүдээс бусад бүх галт зэвсгээс авахаар хуульчилсан байдаг аж. Гэхдээ татварын хэмжээ нь тийм ч их биш юм билээ.

Тодруулбал,

Үзмэр, цуглуулга, спорт-сургалтын зориулалттай галт зэвсэг 15000

Ан агнуур, харуул хамгаалалтын зориулалттай галт зэвсэг     15000

6,4 мм хүртэлх калибрын бүх төрлийн галт зэвсэг                     30000

6,5 түүнээс дээш мм-ийн калибрын бүх төрлийн галт зэвсэг    60000

Үрлэн сумтай галт зэвсэг                                                                30 000 төгрөгийн татвар төлнө.

Тиймээс өндөр торгуулиас татгалзаж, багахан татварыг жилд ганцхан удаа төлөөд галт зэвсгээ хуулийн дагуу эзэмших боломж галт зэвсэгтэй хүн бүрт байна шүү. Яг одоо бүртгэл явагдаж байгаа бөгөөд ирэх сарын 12-ны өдрийг хүртэл үргэлжилнэ. Та амжиж өөрийн эзэмшлийн галт зэвсэг болон түүнтэй адилтгах хэрэгслээ бүртгэлжүүлээрэй.