Саяхан дөрөв дэх удаагаа дэлхийн аварга болсон Г.Угалзцэцэг өнөөдөр Монгол Улсын гавьяат тамирчин боллоо. Дөнгөж сая энэ хүндтэй шагналаа Монгол Улсын Ерөнхийлөгч Х.Баттулгаас гардан авлаа.

Тэрбээр бодибилдинг, фитнессийн дэлхийн  аварга шалгаруулах тэмцээний дөрвөн удаагийн аварга Бодибилдингийн тамирчин юм. Гавьяат тамирчин болсныхоо дараа тэрбээр ийн сэтгэгдлээ хуваалцлаа.

Г.Угалзцэцэг “Төрийн дээд шагнал авсандаа маш их сэтгэл хангалуун сайхан байна. Дөрвөн удаа дэлхийн аварга болоод энэ шагналыг хүртсэндээ баяртай байна. Намайг үргэлж хурцалж, урам  өгч байдаг хүмүүстээ баярлалаа. Цаашдаа дахиад илүү олон удаа дэлхийн аварга болмоор байна” гэлээ.

Эргэн сануулахад, Г.Угалзцэцэг нь хамгийн сүүлд Тайландын Чианг Май хотод энэ сарын 14-16 ѳдрүүдэд зохион байгуулагдсан WBPF холбооны 10 дахь удаагийн ДАШТ-нд оролцсон ОУХМ Г.Угалзцэцэг хос алтан медаль хүртсэн юм. Мөн Г.Угалзцэцэгийн хувьд өмнө нь 2016 онд Тайландын Бангкок хотноо болсон бодибилдинг, фитнессийн ДАШТ-ий эмэгтэйчүүдийн атлетик ангилалд оролцож алтан медаль хүртэж байсан. Мөн 2017 онд БНСУ-ын Сөүл хотноо болсон Ази тивийн бодибилдингийн аварга шалгаруулах тэмцээнээс алтан медаль хүртэж дэлхийн хошой аварга болж байсан билээ.