“Шударга бусын хонгилыг нураана”, “МАНАН дэглэмийг нураана” гээд л сүр сүр лоозон өргөж, УИХ-ын даргаа огцруулахаар залуу гишүүд нэгдсэн. Хэдий урт хугацаанд тэмцэж, төрийн ажлыг багагүй саатуулсан ч тэмцэл үр дүнд хүрч УИХ-ын дарга чөлөөлөгдөх нь тодорхой болов уу гэхтэй давхцаад, түүний ажлыг үргэлжлүүлэх дараагийн даргын нэр яригдаж эхлэв.

Харамсалтай нь улстөрийн тогоонд идээ бээр мэт бугласан шударга бус зүйлээ улиг болтлоо төрд суусан М.Энхболд даргатайгаа үндсээр нь аваад хаях нь уу гэтэл дахиад л УИХ-д буг болтлоо суусан “хөгшчүүл” энэ хүний ажлыг үргэлжлүүлэх “бор шувуу” саарал ордонд жиргэж эхлэв.

Тодруулбал, төр түшилцэх их үүргийг үүрнэ хэмээн УИХ-д 20-28 жил УИХ-ын гишүүн, Засгийн газрын гишүүнээр ажилласан Ц.Нямдорж, Ө.Энхтүвшин, Н.Энхболд нарын нэр УИХ-ын даргын сунгааны тэргүүн эгнээнд яваа сурагтай. Тэднийг хаанаас, хэн авчирч залсан юм бол доо гэлтэй “шавар бурхан” шиг үе үеийн парламентад сууж л байдаг. Яг үнэндээ тэднээс цаг үе, улс төр, ард түмэн бүхэлдээ залхчихаад байгааг тэд мэдэхгүй л яваа. Хийсэн гавьяагүй ч, хийгүй цэвэрхэн “идэж уусных” нь юм байлгүй дээ, хөөрхийс.

Тэд энэ олон жил төрийн өндөр албан тушаал хашихдаа юу хийв, төр улс, түмэн олноо юугаар гийгүүлэв. Авилгал, хүнд сурталд идэгдсэн төрийн албан хаагчдыг бий болгож, гэмт хэрэгтнүүдийн үүр уурхайг төрийн ордонд цогцлоов уу. Өнөөх алдарт шударга бусын хонгилыг байгуулалцав уу. Тэднийх гээд онцолчих гавьяа юу байна. Хийсэн гавьяагүй атлаа сайд дарга болох дуртайг яана.

Хаана л дарга, сайдын суудал онгойно тэнд өнөөх “хөгшчүүл” нь гүйж явах юм. Ичих булчирхай байдаг бол энэ олон жилийн дотор эх орноо хөгжүүлж, мандуулж чадаагүйгээ огоорох хэрэгтэй шүү дээ. Ойлгох нь бүү хэл, Ц.Нямдорж сайд, “Хамаг хэцүү үедээ хуульзүйн салбараа  надад атгуулдаг. Би хичээж л байна. Та нар л намайг гуйдаг биз дээ” хэмээн чуулганы танхимд “томорч” байгаа харагдсан.

Үнэт эдлэл, дарс зэрэг зарим зүйлсийн он нь хуучрах тусмаа үнэ хүрдэг шиг өөрсдийгөө улам үнэд орно хэмээн бат итгэчихсэн бололтой. Ингэж бодож яваа бол тэд сэрүүн зүүдэлж байна. Зүүднээс нь сэрээж, бодит байдлыг учирлахсан.

Болдог бол М.Энхболдыг огцруулахтай зэрэгцээд энэ хэдэн “хөгшчүүл”-ийг ч гэсэн тэтгэвэрт нь суулгачих юмсан. Ихийг бүтээсэн хэмээн өөрсдийгөө үнэлж байгаа тэдэнд “Баярлалаа” гэж хэлээд ч болтугай чуулганы танхимыг орхиулах юмсан. Хэдэн үеэрээ идэх хоолоо хангалттай олсныг нь хэнийх нь ч хөрөнгө орлогын мэдүүлгээс харж болохоор байгаа. Одоо тэдэнд юу дутуу гэж төр самрах гээд төрийн жолоо булаацалдаад байна вэ. Ханаж цадах цаг нь болж, ичих булчирхай нь цочих болсон л байлтай.