Улс төр бужигнаж эхлэх нь ээ. УИХ-ын ээлжит бус чуулган ирэх долоо хоногийн даваа гараг буюу 18-нд хуралдаж эхэлнэ. Өнөөдрөөс эхлээд бүлгүүд болон байнгын хороод хуралдах бололтой.   Ээлжит бус чуулганаар олон хүний эрх ашгийг хөндсөн хууль, тогтоолын төслүүд хэлэлцэгдэхээр өргөн баригдаж байна. Ерөнхийлөгч Х.Баттулга гэхэд АТГ-ын дарга, дэд дарга, Ерөнхий прокурорын орлогч зэрэг албан тушаалтнуудын хугацаа дуусаж байгаа учраас дараагийн хүнийг томилох төслөө өргөн барьсан. Мөн УИХ-ын 10 орчим гишүүний бүрэн эрхийг түдгэлзүүлэх асуудлыг Улсын ерөнхий прокуророос оруулж хэлэлцүүлэх нь тодорхой болоод байгаа.

УИХ-ын 23 гишүүн ЖДҮХС-аас зээл авсан асуудлаар одоо АТГ-т шалгагдаж буй. Тэднээс Д.Дамба-Очир, Г.Солтан,  Л.Энхболд, Б.Ундармаа,  Б.Батзориг нарын бүрэн эрхийг түдгэлзүүлэх асуудлыг Улсын ерөнхий прокуророос  өнгөрсөн намрын чуулганд оруулсан. Гэвч бүрэн эрхийг түдгэлзүүлэхгүйгээр шалгах боломжтой гэж УИХ үзсэн. Саяхан хийсэн мэдээллээр бол эдгээр таван гишүүнийг ЖДҮХС-аас зээл авсан асуудлаар яллагдагчаар татах дүгнэлтэд гарын үсэг зурсан бөгөөд хэргийг үргэлжлүүлэн шалгаж байгаа гэж мэдэгдсэн.

Мөн Ж.Энхбаяр, М.Оюунчимэг, Х.Нямбаатар, Н.Оюундарь, Х.Болорчулуун нарын гишүүдийн бүрэн эрхийг түдгэлзүүлэх асуудал яригдаж эхэлсэн тухай хэвлэлүүд мэдээлж байна.

Эх сурвалжийн мэдээлж буйгаар гишүүд хууль хяналтынхныг дуудсан цагт очихгүй, гарын үсэг зурахгүй гэх мэтээр ЖДҮХС-аас зээл авсан асуудлаар шалгахад бүрэн эрх нь саад учруулж байгаа учраас дахин өргөн барихаар болж байгаа аж.

Ер нь бол хүн бүр ЖДҮХС-аас УИХ-ын гишүүд зээл авсаныг буруутгаж, бүр үзэн ядах хэмжээнд байгаа. Монгол HD телевизийн Шарк Танк нэвтрүүлэгт жижиг дунд бизенс эрхлэгчид 50 сая төгрөг хоёр жил хөөцөлдөж олж авлаа хэмээн нулимс дуслуулж байхад УИХ-ын 23 гишүүн маш бага хүүтэй 950 сая төгрөг аваад зарим нь ББСБ ажиллуулж, хүүгээр баяжиж сууж байгаа нь ард түмнийг бухимдуулж байгаа юм.