Монголд дахин нэг улстөрийн нам шинээр мэндлэх тухай шинэхэн мэдээ өчигдөр олны чихэнд хүрсэн. Тодруулбал, АН-ын гишүүн байсан ч намаасаа хөөгдсөн Л.Болд, намын удирдлагуудаасаа жавтий хүртсэнийхээ төлөө намаасаа гарах сонголт хийсэн Ж.Батзандан хоёр шинэ нам байгуулахаар зэхэж буйгаа өчигдөр эхэлсэн ээлжит бус чуулганы нээлттэй давхцуулан олон нийтэд мэдээлсэн.

Энэ талаар УИХ-ын гишүүн Л.Болд “АН-аас Үндсэн хууль зөрчиж УИХ-ын гишүүдийг намаас хөөсөн. Үүний улмаас миний бие АН-ын удирдлагуудад сануулга өгч намаас гарсан. Гэсэн ч АН-ын удирдлагууд алдаагаа засах гэж оролдсонгүй. Ингэснээр УИХ дахь АН-ын бүлэг эрх зүйн чадамжгүй болсон. Энэ явдлын дараагаар Ж.Батзандан гишүүн бид хоёр сонгогчидтойгоо уулзахад сонгогчид маань 100 хувийн саналаар ард түмний сонголтыг үгүйсгэсэн АН-ын үйлдлийг буруутгаж байсан. Энэ дагуу 2019.03.18-ны энэ өдөр УИХ-д суудалтай шинэ намыг зарлаж байна Бид Монголын хамгийн зөв бодлогуудыг хэрэгжүүлэх болно” гэсэн юм.

Харин Ж.Батзандан гишүүн “Монголыг хамгаалах улс төрийн хүчин Монголд хэрэгтэй байна. Монголд шударга ёсыг тогтоож чадах цоо шинэ хүчнийг Монголын ард түмэн үгүйлж байна. Тиймээс шударга ёс, хуульч ёсны төлөөх намыг байгуулж байна. Нам үүсгэн байгуулах их хурлыг ойрын хугацаанд хуулийн хүрээнд зохион байгуулах болно. Их хурлаар намын нэр, дүрэм, үзэл баримтлалыг баталж, Улсын дээд шүүхэд бүртгүүлэх болно” гэв.

Ийнхүү УИХ-д суудалтай цоо шинэхэн нам байгуулж, Монголоо аврахаар сэтгэл шулууджээ. Тэд Монголыг үнэхээр аварч чадах болов уу. Тэдэнтэй нэгдэх хэр олон хүн байгаа бол. Тэдэнд бурхан тусалж байгаа гэнэ. Хаврын синдром оо гэж.