УИХ-ын намрын чуулганд гишүүд хэрхэн оролцсон талаар ирцийн мэдээллийг хүргэе. Хамгийн идэвхтэй гишүүнээр гишүүн М.Билэгт, УИХ-ын дарга асан М.Энхболд,С.Чинзориг нарыг нэрлэж болохоор байна. Тэдний ирц 100 хувь бүртгэгджээ.

Харин намрын чуулганд гадаадад ажиллаж байгаа гэх шалтгаанаар хамгийн олон удаа чөлөө авсан гишүүнээр  Д.Тэрбишдагва, Д.Цогтбаатар (Гадаад хэргийн сайд), Д.Сумъяабазар (Уул уурхайн хүнд үйлдвэрийн сайд) нар тэргүүлсэн байх юм.

Түүнчлэн хамгийн олон цагаар чөлөө авсан гишүүдийн “саарал жагсаалт”-ыг Б.Наранхүү гишүүн тэргүүлжээ. Түүнээс ч илүү хар гэмээр жагсаалт нь хэл сураггүй алга бологчид гэж бий. Хэл сураггүй тасалдаг, хамгийн олон таслалттай гишүүнээр О.Содбилэг тодорчээ. Тэрээр чуулганы нийт хугацааны 22.1 хувьд нь бүртгэлд ороогүй аж.

Уг нь бол сонгогчдынхоо дуу хоолой болно хэмээн том амлалт, өндөр хариуцлагыг үүрсэн хүмүүс энэ танхимд цугладаг. Гэвч тэд хариуцлагаа иймэрхүү маягаар л ухамсарлаж байна даа. Тэднийг сонгосон хүмүүс юу бодож суугаа бол доо. Дээрх хариуцлагагүй гишүүд ирэх УИХ-ын сонгуулиар ичихгүй дахиад л том том яриад сонгогчдоо царайчлан очих л байх даа. Тэдэнд ямар ичих нүүр гэж байх биш.