Авлигатай тэмцэх газрын шинэ удирдлагуудыг өнгөрсөн долоо хоногт томилсон билээ. Ингэхдээ АТГ-ын даргаар Х.Энхжаргалын оронд З.Дашдавааг, дэд даргаар Ц.Нямдоржийн оронд Ж.Батсайханыг томилсон юм.

Байнга шахуу хэл амны бай болдог, хийх ажил дэндүү ихтэй тус байгууллагын даргаар ажиллаж байсан Х.энхбаргал гэх эрхэмд олон нийт маш сайн дүн тавьчихсан учраас түүнээс сайн ажиллах өндөр хариуцлага шинэ удирдлагуудад ирэх нь дэмжиггүй. Тиймээс АТГ-ын дарга, дэд даргаар сонгогдсон З.Дашдаваа, ж.Батсайхан нараас хүлээх хүлээлт их бий.

Тэгвэл шинэхэн дарга З.Дашдаваа “Хууль бусаар баяжих гэдгийг яаж тогтоох талаар ХОМ-т үнэлгээ, шинжилгээ хийж тогтооно. Мөн иргэдийн мэдээллийн дагуу шалгана. Манайх ХОМ-ыг аваад байгаа. Тэр хүнийг зарлагыг тооцдоггүй. Тухайн хүн нэг сая төгрөгийн цалинтай байж таван сая төгрөгийн хэрэгцээтэй байвал яах вэ. Хэрвээ томилогдвол энэ чиглэлээр ажиллая гэж бодож байгаа” гэх амлалтыг өгөөд байгаа. 

Харин АТГ-ын дэд дарга Ж.Батсайхан “ХОМ, хувийн ашиг сонирхлын зөрчлийг хянаж шалгадаг нь чухал үүрэгтэй ажил. Төрийн байгууллагуудын үйл ажиллагаатай холбоотой хийсэн дүгнэлт гарсан байдаг. Төрийн албыг хашихад сонирхлын зөрчлийн асуудал өргөн ойлголт юм билээ.

Хувийн ашиг сонирхлыг нийтийн ашиг сонирхлоос ангид байлгана. Хууль бусаар хөрөнгөжихийн эсрэг конвенцид 2015 оноос нэгдсэн. Олсон хөрөнгө орлогоо тайлбарлаж чадаагүй бол гэдэг тодорхойлолт байдаг” хэмээн ам гарсан.            Ийнхүү тэд төрийн алба хаагчдын Хөрөнгө орлогын мэдүүлгийг шалгаад зогсохгүй, зарлагын мэдээллийг ч хянадаг болох тухайгаа мэдэгдээд авлаа.

Ингэснээр дансандаа 100 сая төгрөгтэй хүн 500 сая машин авч унаж уу, гэдгийг шалгаад зогсохгүй бусад орлогын эх үүсвэрээ хаанаас бүрдүүлж байгааг шалгаж, нягтлах боломж бүрдэнэ гэж үзэж байгаа бололтой.

Юутай ч томоохон концесс, төрийн тусгай сангуудын мөнгө, төсөл хөтөлбөрүүдтэй холбоотой асуудлууд гээд тэдэнд шалгах асуудал бишгүй олон байгаа. Шинэхэн дарга нарын ажил урд нь овоолоостой байгаа нь тодорхой. Харин тэд хэрхэн ажиллах бол гэдэг хүлээлт ард түмний өмнө байна.