Монгол Улсын Ерөнхийлөгч өчигдөр Үндсэн хуульд оруулах нэмэлт өөрчлөлттэй холбоотой санал, дүгнэлтээ танилцуулж, үүнтэй холбоотой хуулийн төсөл өргөн барьсан. Тэгвэл өнөөдөр Шүүх эрх мэдлийн хариуцлагыг дээшлүүлж, хараат бус байдлыг хангахтай холбоотой нэмэлт, өөрчлөлтийн дэд ажлын хэсэг хуралдаж, энэ асуудлаар хэлэлцэв. Энэ үеэр Ерөнхийлөгчийн өргөн мэдүүлсэн төслийн 3 дугаар зүйлийн 3.5.1 дэх хэсэг буюу Монгол Улсын Үндсэн хуулийн Дөчин наймдугаар зүйлийн 48.1 дэх хэсгийг өөрчлөн найруулахтай холбоотой заалтыг хэлэлцэх үеэр “Үндсэн хуулийн нэр томъёо салаа утгагүй, тов тодорхой, маш богинохон, монголчуудын хэлдгээр “шахсан бяслаг” шиг байх ёстой юм” гэдгийг профессор Н.Лүндэндорж тодотгожээ.