Нийслэлийн Сүхбаатар дүүргийн нутаг дэвсгэрт 2019 оны 4 дүгээр сарын 29-ний өдрөөс 2019 оны 5 дугаар сарын 09-ний өдрийн хооронд иргэн М.Т нь 10 настай ач охиноо эсэргүүцэл үзүүлэх чадваргүйг нь мэдсээр байж удаа дараа хүч хэрэглэн хүчиндсэн гэх  гэмт хэрэг гарсан. Энэ мэдээлэл олон нийтийг цочроож, бас жигшил зэвүүцлийг ихэд хүргэсэн.

Дээрх гэмт хэрэгт тус дүүргийн прокурорын газраас хяналт тавьж, Эрүүгийн хуулийн 12.1 дүгээр зүйлийн 4-т зааснаар яллагдагчаар татан мөрдөн шалгах ажиллагаа явуулж, яллах дүгнэлт үйлдэн шүүхэд шилжүүлсэн байна.

Сүхбаатар дүүргийн Эрүүгийн хэргийн анхан шатны шүүх шүүгдэгч М.Т-д 12 жилийн хорих ял оногдуулж, ялыг хаалттай хорих ангид эдлүүлэхээр шийдвэрлэжээ. Харин хохирогчид "Гэрч хохирогчийг хамгаалах тухай" хуульд заасны дагуу түр хамгаалах байранд байлгаж, биечилсэн хамгаалтад авах арга хэмжээг авсан байна.