М.Энхболдыг чөлөөлөх хуулийн төслийг гишүүдийн 94.7 хувь нь дэмжлээ

 М.Энхболдыг чөлөөлөх хуулийн төслийг гишүүдийн 94.7 хувь нь дэмжлээ

Эрх баригчдын хагарал эцэстээ тулж, УИХ-ын чуулганы хуралдаанаа хүртэл хуралдуулж чадахгүйд хүрээд бараг хоёр сар болох гэж байна. Учир нь УИХ-ын дарга М.Энхболдыг огцруулахаар УИХ-ын 40 гишүүний гарын үсэг үсэг бүхий шаардлагыг тавьсан. Түүгээр зогсохгүй энэ шаардлагыг биелүүлтэл УИХ-ын чуулганы хуралдаандаа суухгүй хэмээн “бойкот” хийсээр өнөөдрийг хүргэсэн. Энэ хугацаанд хоёр ч удаа бүх нийтийн жагсаалыг Д.Сүхбаатарын талбайд хийсэн. Гэвч УИХ-ын дарга М.Энхболд “Би хуулийн хүрээнд ажиллаж байгаа. Огцрохгүй” хэмээн удаа дараа мэдэгдсэн.

Тэгвэл өчигдөр ҮАБЗ хуралдаж, Монгол Улсын Ерөнхийлөгчийн 2019 оны нэгдүгээр сарын 3-ны өдөр УИХ-д өргөн мэдүүлсэн Монгол Улсын Их хурлын чуулганы хуралдааны дэгийн тухай хуульд нэмэлт өөрчлөлт оруулах тухай хуулийн төслийг 2019 оны нэгдүгээр сарын 10-нд багтаан хэлэлцэн батлах ёстой гэсэн зөвлөмж гаргажээ.

Тиймээс ҮАБЗ-ийн зөвлөмжийн дагуу удтал дуншсан УИХ-ын чуулганы хуралдаан урьд шөнө хуралдлаа. Үүрийн 4:30 минут хүртэл хуралдсан ч бүрэн эрхийг нь түдгэлзүүлэхээр хэлэлцэж байгаа дөрвөн гишүүний асуудлаар зургаан цагийн завсарлага авч, одоо 10:00 цагт эргэн хуралдахаар болов. Дашрамд хэлэхэд, Халдашгүй байдлын дэд хороо, Төрийн байгуулалтын байнгын хороо, Хууль зүйн байнгын хороогоор Г.Солтан, Б.Ундармаа, Л.Энхболд, Д.Дамба-Очир нарын бүрэн эрхийг түдгэлзүүлэх шаардлагагүй гэж үзээд байгаа билээ.

Харин УИХ-ын гишүүдийн 94.7 хувь нь Ерөнхийлөгчийн санаачилсан Монгол Улсын УИХ-ын чуулганы хуралдааны дэгийн тухай хуульд нэмэлт оруулах тухай хуулийн төсөл болон хамт өргөн мэдүүлсэн УИХ-ын тухай хуульд нэмэлт оруулах хуулийн төслийг хэлэлцэхийг дэмжсэн. Ингэснээр УИХ-ын даргыг огцруулах заалт бүхий хуулийн төслийг Төрийн байгуулалтын байнгын хороо руу шилжүүллээ.

Эргэн сануулахад, Ерөнхийлөгчийн өргөн барьсан энэхүү хуулийн төсөлд Улсын Их Хурлын гишүүдийн олонхи Улсын Их Хурлын даргыг огцруулах тухай саналыг Улсын Их Хуралд албан ёсоор тавибал нэн яаралтай журмаар хэлэлцүүлэх асуудлыг тусгаж, дагаж мөрдөх хугацааг заасан байна.

 “Хуулийн төсөл батлагдсанаар Улсын Их Хурлын үйл ажиллагаа гацаанаас гарах, хүлээгдэж буй нийгэм, эдийн засгийн асуудлууд шийдвэрлэгдэх, хууль дээдлэх ёс бэхжих зэрэг эерэг үр дагавар бий болно гэж үзэж байгаа аж.

Хуулийн төсөл нь Монгол Улсын Үндсэн хууль, нэгдэн орсон олон улсын гэрээ, конвенц, холбогдох бусад хуультай нийцсэн бөгөөд хуулийн төсөлтэй холбогдуулан Монгол Улсын Их Хурлын тухай хуульд нэмэлт оруулах тухай хуулийн төсөл боловсруулсан болно” хэмээн төслийн танилцуулгад дурдаж байсан билээ.

Энэ хуулийн төслөөр М.Энхболдыг огцруулах биш чөлөөлөх юм байна.

Гишүүдийн 94.7 хувь нь Ерөнхийлөгчийн санаачилсан хуулийн төслийг дэмжиж байгаа учраас энэ энэ хуулийн төсөл батлагдчих болов уу гэсэн найдлага хүн бүрт бий. Хэрэв батлагдчихвал УИХ-ын дарга М.Энхболд ажлаасаа чөлөөлөгдөх нь тодорхой болно гэсэн үг. Ашгүй төрийн ажил гацаанаас гарах нь. Ард түмэн үүнийг л хүсч, идэр есийн хүйтэнд гадаа жагссан шүү дээ.

 

 

 

 

ХОЛБООТОЙ МЭДЭЭ
МЭДЭЭНИЙ СЭТГЭГДЭЛ

АНХААРУУЛГА:Уншигчдын бичсэн сэтгэгдэлд mminfo.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99998796 утсаар хүлээн авна.