Улаанбаатар -4oC

Б.Энх-Амгалан: Авто машины улсын дугаарын шинэ стандарт гаргах шаардлагагүй

Б.Энх-Амгалан: Авто машины улсын дугаарын шинэ стандарт гаргах шаардлагагүй

Зам, тээврийн хөгжлийн сайд Б.Энх-Амгалан өнөөдөр “Авто тээврийн үндэсний төв” ТӨҮГ-ын үйл ажиллагаатай танилцаж, авто тээврийн салбарын ажилтан, албан хаагчидтай уулзаж, санал солилцсон байна. Уулзалтын үеэр Авто тээврийн үндэсний төвийн захирал П.Дэлгэрнаран байгууллагын үйл ажиллагааны танилцуулга хийж, 1925 онд “Монгол Улсын тээх, нэвтрүүлэх газар”-аас эхлэлтэй тээврийн байгууллага өдгөө улс, хот хоорондын ачаа болон зорчигч, жуулчин, шуудан тээвэрлэлтийн үйлчилгээг зохион байгуулах, автотээврийн хэрэгслийг бүртгэх, улсын дугаар олгох, тээврийн хэрэгслийн техникийн хяналтын үзлэг хийх, мэргэшсэн жолоочийн шалгалт авах, үнэмлэх олгох, авто үйлчилгээний байгууллагад ангилал тогтоох зэрэг өргөн хүрээнд үйл ажиллагаа явуулж байгаа талаараа танилцуулжээ. ЗТХ-ийн сайд Б.Энх-Амгалан “Хөдөлгөөний аюулгүй байдлыг хангахад ЗТХЯ болон АТҮТ онцгой анхаарал хандуулан ажиллах шаардлагатай байна. Үүний тулд тээврийн хэрэгслийн бүрэн бүтэн байдлыг хангасан тээврийн хэрэгсэл хөдөлгөөнд оролцох, жолооч нар мэргэшсэн байх, тээврийн хэрэгслийн бүртгэлийн үйл ажиллагаа боловсронгуй байх зэрэг олон хүчин зүйл нөлөөлөх тул эдгээр чиглэлийг хариуцаж байгаа АТҮТ ихээхэн анхаарал хандуулж ажиллах шаардлагатай” хэмээн уулзалтын үеэр хэллээ. Ази Европыг холбосон хамгийн ашигтай гарц болох Монгол Улс тээврийн салбараа улам хөгжүүлж, валютын урсгалыг нэмэгдүүлэх боломж манай улсад бүрэн бий хэмээн онцолж, цаашид транзит тээвэрлэлтийг идэвхижүүлэхэд анхаарах хэрэгтэй хэмээн онцолжээ. Мөн тэрээр улс, хот хоорондын зорчичгч тээврийн үйлчилгээ үзүүлж буй 1090 тээврийн хэрэгслийн GPS төхөөрөмжөөр жилд 170 мянга гаруй тээвэрлэлтийг хянаж буй Хөдөлгөөний удирдлагын төвийн үйл ажиллагаатай танилцаж, хяналтын системийг цахим болгох, хяналтыг сайжруулах тал дээр томоохон ахиц дэвшил гарсан байгааг сайшаасан байна. Түүнчлэн тээврийн хэрэгслийн бүртгэлийн үйл ажиллагаатай танилцаж, мотоциклийг бүртгэлжүүлэх, техникийн хяналтын үзлэгт бүрэн хамруулах, тээврийн хэрэгслийн улсын дугаарт шинэ сери нэмэгдүүлэх, олон улсын стандартад нийцүүлэх зэрэг ажлуудыг шат дараатай эхлүүлэх талаар үүрэг чиглэл өглөө. Жилээс жилд импортоор орж ирэх автомашины тоо нэмэгдэж байгаа тул тээврийн хэрэгслийн дугаар олголт, бүртгэлжүүлэх үйл ажиллагааг заавал улсын дугаарын шинэ стандартыг хэрэгжүүлж, солих шаардлагагүй бөгөөд шинэ сери гаргах байдлаар зохицуулах боломжтой гэдгийг тэрээр хэлжээ.

ХОЛБООТОЙ МЭДЭЭ
МЭДЭЭНИЙ СЭТГЭГДЭЛ

АНХААРУУЛГА:Уншигчдын бичсэн сэтгэгдэлд mminfo.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99998796 утсаар хүлээн авна.