Сонгуулийн сурталчилгаа албан ёсоор эхэллээ

Сонгуулийн сурталчилгаа албан ёсоор эхэллээ

УИХ-ын найм дахь удаагийн сонгуулийн санал хураалт зургаадугаар сарын 24-нд болно. Улсын Их Хурлын сонгуулийн тухай хуулийн дагуу нэр дэвшигчид өнөөдөр Сонгуулийн ерөнхий хорооноос нэр дэвшигчийн үнэмлэхээ гардан авснаар сурталчилгаа хийх эрх нээгдэж байна.

Энэ удаагийн сонгууль 13 нам, дөрвөн эвсэл, 121 бие даагч, нийтдээ 639 хүн өрсөлдөж байгаа хамгийн олон нэр дэвшигчтэй гэдгээрээ онцлог. Сонгуулийн ерөнхий хорооноос өнгөрсөн долоо хоногт хуулийн хугацаанд баримт, бичгээ бүрдүүлж өгөн, нэр дэвших болзол хангасан, бичиг баримтын зөрчилгүй нэр дэвшигчдэд тогтоолыг нь гардуулсан. Харин өнөөдөр хуулийн дагуу нэр дэвшигчдэд үнэмлэх гардуулж, нэрсийг олон нийтэд зарлах юм.

СЕХ нам, эвслээс нэр дэвшигчдийн үнэмлэхийг өглөө 09:00 цагаас эхлэн 30, 30 минутын зайтай өгнө. Харин бие даан нэр дэвшигчдийн үнэмлэхийг өглөөний 08:00 цагаас эхлэн 1 цагт 12 нэр дэвшигчдийн үнэмлэхийг өгч 18 цагт дуусахаар төлөвлөжээ. 2020 оны сонгуулиар анх удаа нэр дэвшигчдийн хөрөнгө орлогын мэдүүлгийг авч байгаа. Авлигатай тэмцэх газар СЕХ-ноос ирүүлсэн мэдээллийг үндэслэн нийт 698 нэр дэвшигчийн ХОМ мэдүүлэх эрхийг цахим системд үүсгэснээс хуулийн хугацаанд 647 нэр дэвшигч буюу 92.6 хувь нь ХОМ-ээ гаргаж баталгаажуулсан, харин 51 нэр дэвшигч мэдүүлгээ гаргаж бүртгүүлээгүй тухай мэдээлжээ.

Улсын Их Хурлын сонгуулийн тухай хуулийн 32-р зүйлийн 32.15-д заасныг үндэслэн өнөөдөр буюу 2020.06.02-ны өдөр АТГ-ын цахим мэдээллийн сүлжээнд нэр дэвшигчдийн ХОМ-ийг нээлттэй байршуулах тул тухайн нэр дэвшигчийн орлого, хөрөнгийн байдалтай иргэд, олон нийт танилцах бүрэн боломжтой. Найм дахь удаагийн сонгууль дэлхий нийтийг хамарсан цар тахлын үед зохион байгуулагдаж байгаа тул коронавируст халдвараас урьдчилан сэргийлэх хүрээнд нэр дэвшигчид, сонгуулийн штабын ажилчид болон ард иргэд нийтээр дагаж мөрдөх журмыг батлан гаргаад байна.

Энэ журамд сонгуулийн сурталчилгааг цахим хэлбэрээр хийх, танхимд уулзах бол хүн хоорондын зайг барих, нэг уулзалт 2 цагаас удаан хугацаанд үргэлжлэхгүй байх, уулзалт болж байгаа газарт 30 минут тутамд цэвэрлэгээ хийж, агаарын солилцоо оруулах зэрэг зохицуулалтыг тусгасан. Үүнээс гадна айлын хаалга тогшиж, сурталчилгааны материалыг биечлэн өгөхийг хоригложээ.

ХОЛБООТОЙ МЭДЭЭ
МЭДЭЭНИЙ СЭТГЭГДЭЛ

АНХААРУУЛГА:Уншигчдын бичсэн сэтгэгдэлд mminfo.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99998796 утсаар хүлээн авна.