Л.Энх-Амгалан: Есдүгээр сарын 1-нээс танхимаар хичээллүүлэхээр бэлтгэл ажлаа хангаж байна
Цар тахлын улмаар хүүхдүүд хоёр жил орчим хугацаанд зайнаас хичээллэсэн билээ.
Харин ирэх есдүгээр сарын 1-нээс хичээл танхимаар орох ээх нь одоогоор тодорхойгүй байгаа юм. Тэгвэл Боловсрол, шинжлэх ухааны сайд Л.Энх-Амгалан есдүгээр сараас эхлэн танхимаар хичээллүүлэхээр ажиллаж буй талаараа мэдээллээ.
Тэрбээр "Сургууль хичээл эхлүүлэх хугацаа Боловсролын хуулийн дагуу зохицуулдаг. Тийм учраас бид хуулиа хэрэгжүүлнэ. Гэхдээ ковидийн нөхцөл байдал хэрхэхийг хэлэхэд хэцүү байна. Өнөөдөр 12-17 насны хүүхдүүдийн 70 орчим хувь нь вакцины хоёр дахь тундаа хамрагдаж байна. ЕБС-ийн багш нарын 80 орчим хувь нь мөн адил хоёр дахь тундаа хамрагдсан.
Намрын хичээлийн жилийг хуулийн хугацаанд нээхийн хичээж ажиллана. Есдүгээр сарын 1-нд хичээлээ эхлүүлэхээр аймаг орон нутаг, сургууль цэцэрлэгийн удирдлагуудад чиглэл өгч бэлтгэл ажлаа хангаж байгаа. Гэхдээ эцсийн шийдвэрийг Засгийн газар гаргана.
Бид энэ жилийн есдүгээр сарын 1-нд хичээлээ эхлүүлэхгүй бол хоёр жилийн турш танхимын хичээлийг бүрэн хаасан цөөн хэдэн улсын тоонд орохоор байна. Хичээлийн хоцрогдол маш их үүссэн. Нэгэнт бид ковидтой дасан зохицон амьдрахаас хойш хичээлийн жилийн хугацаанд нь танхимаар эхлүүлэхээр бэлтгэл ажлыг хангаж ажиллаж байгаа.
Бид бусад улсын туршлагыг судалж байгаа. Хоёр тунгаа хийлгэсэн бол халдвар авахдаа хөнгөн өвчилж байна. Би ч мөн вакцин хийлгэсэн ч халдвар аваад тав хоног хөнгөн өвдөөд дахин шинжилгээ өгөхөд сөрөг гарсан. Тэгэхээр үүнтэй адилаар сургуулийн багш ажилтнууд ихэнх нь хоёр тунгаа хийлгэсэн учир эрсдэл бага байх болов уу гэж бодож байна. Хоёрдугаарт, өчигдрийн байдлаар ДЭМБ-аас өгсөн мэдээллээр 12-оос доош насны хүүхдүүдэд эрсдэл бага байгаа гэсэн судалгаа хийгдэж байгаа юм билээ. Вакцинжуулалтын асуудлыг УОК, ЭМЯ-наас шууд хариуцаж байгаа ба цаашлаад гурав дахь тунг хийх эсэхийг Засгийн газрын хэмжээнд хэлэлцэж, шийдвэр гаргана байх гэж бодож байна.
Эхний ээлжид ногоон бүсэд хичээлийг эхлүүлнэ. Хамгийн гол нь эрсдэлтэй байгаа улаан бүсэд хичээлийг танхимаар эхлүүлэхээр бэлтгэл ажлыг хангаж байна. Өнгөрсөн долоо хоногт дэлхийн боловсролын салбарын сайд нарын цахим хуралд оролцоход манай улс хичээлээ хамгийн удаан хугацаанд хааж байгаа улсын тоонд багтаж байна. Тиймээс бид, эцэг эхчүүд, багш, сурагчид бүгд хичээгээд энэ хичээлийн жилээ есдүгээр сарын 1-нд танхимаар эхлүүлэх зорилгын төлөө ажиллахыг уриалж байна" гэлээ.
ХОЛБООТОЙ МЭДЭЭ
МЭДЭЭНИЙ СЭТГЭГДЭЛ
АНХААРУУЛГА:Уншигчдын бичсэн сэтгэгдэлд mminfo.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй.
Сэтгэгдэлтэй холбоотой санал гомдлыг 99998796 утсаар хүлээн авна.
Улаанбаатар oC
