БОАЖЯ-ныхан ажлын байрандаа эко сурагчдаар үнэлгээ хийлгэв

БОАЖЯ-ныхан ажлын байрандаа эко сурагчдаар үнэлгээ хийлгэв

БОАЖЯ-ны Ногоон хөгжлийн бодлого, төлөвлөлтийн газар, Цэвэр технологи, хөрөнгө оруулалт, үйлдвэрлийн хэлтсээс санаачлан Даян дэлхийн ногоон хөгжлийн байгууллага, Ногоон эдийн засгийн түншлэл, “Тогтвортой хөгжлийн боловсрол” төсөл, Монголын банкны холбоо, “Ариг” банк хамтран “Ногоон хөгжлийн төлөө хамтдаа” сарын аяныг зохион байгуулсан. “Ногоон хөгжлийн төлөө хамтдаа” сарын аяны үйл ажиллагааг тайлагнах уулзалт БОАЖЯ-нд өчигдөр боллоо. Энэ үеэр БОАЖЯ-ны Төрийн нарийн бичгийн дарга Ц.Цэнгэл “Ногоон хөгжлийн төлөө хамдаа” сарын аяныг тус яам амжилттай зохион байгуулсныг тэмдэглэж, цаашид  хамрах хүрээг нь тэлэх хэрэгтэйг онцолсон юм.

Мөн төрийн байгууллагууд ногоон хөгжлийн бодлогыг амьдралд хэвшүүлэх ажлыг  БОАЖЯ эхлүүлж, манлайлах, бусад яам, агентлаг, аж ахуйн нэгж байгууллага, иргэд олон нийтэд үлгэр дуурайлал болох шаардлагатай гэв. Ногоон хөгжлийг дэмжин өдөр тутмын амьдралдаа зуршил болгох нь  эдийн засагт хэмнэлттэй,  ирээдүй хойчдоо өгөөжтэй юм. БОАЖЯ-ны Ногоон хөгжлийн бодлого, төлөвлөлтийн газраас санаачлан хийсэн сарын аяны хүрээнд “Дэм дэмэндээ”, “Ногоон элч санаачилга”, “Тогтвортой хөгжил 2030: Төлөвлөлтөөс хэрэгжилтэд”, “Ногоон бизнес эрхлэгчид, үйлдвэр үйлчилгээний байгууллагаар зочлох автобустай аялал”, “Ногоон оффис” гэсэн арга хэмжээнүүдийг үр дүнтэй зохион байгуулжээ. 

“Ногоон хөгжлийн төлөө хамтдаа” сарын аяны үйл ажиллагааг тайлагнах уулзалтад ерөнхий боловсролын 5, 105, 71, “Шинэ эхлэл”, “Шинэ эрин”  зэрэг нийт таван сургуулийн эко сурагчид оролцсон юм. Эко сурагчид БОАЖЯ-ны ажлын байранд  нэг өдрийн ажиглалт, судалгаа хийжээ. Судалгааны үр дүнг хог хаягдал, дулаан, ус, гаднах талбай, цахилгааны хэрэглээгээр дэлгэрэнгүй гаргаснаа мөн танилцууллаа.

Үүнд, БОАЖЯ-ны ажлын байрнаас өдөрт 18.6 кг хог хаягдал гардгаас тал хувь нь боловсруулаагүй цаас байгааг эко сурагчид тооцон гаргажээ. Мөн хог хаягдлыг ялгаж салгаж хаяхыг зөвлөлөө. Түүнчлэн БОАЖЯ-ны ажилчид, албан хаагчид баримт бичгээ 12 фонтоор шивдэг. Хэрвээ 11 фонтын шрифтээр шивж хэвшвэл нийт цаасны 20-30 хувийг хэмнэх боломжтой аж. 

Мөн ажилчид өрөөнөөсөө гарч, орохдоо цахилгаанаа бүрэн унтраадаггүй. Байгалийн гэрэл ашигладаггүй учраас “Ногоон ажлын байр” санаачилгыг эхлүүлж байгаа БОАЖЯ-ыг үүнд анхаарч ажиллахыг эко сурагчид зөвлөлөө. Харин гаднах талбайн тохижилтын тухайд БОАЖЯ-ны гаднах  талбайд машины зогсоол, ажилчид амрах талбай (сүүдрэвч), мод сөөгний тарилт, хогийн  сав хангалтгүй байна хэмээн дүгнэжээ.

Усны зарцуулалтын тухайд яамны нийт ажилчид сард хэрэглэх усандаа 1.2 сая төгрөг зарцуулдаг байна. Гэхдээ 00-оос алдагдаж байгаа болон  гар угаахдаа ашиглаж байгаа усны зарцуулалтад анхаарахыг зөвлөлөө. “Тогтвортой хөгжил гэдэг нь ус, цахилгаанаа хэмнэхийг өдөр тутмын хэрэглээндээ хэвшүүлэх юм” гэж эко сурагч Жавхлан энэ үеэр хэлсэн юм.

Эко сурагчдын хийсэн энэхүү судалгааны дүгнэлтийг БОАЖЯ-ныхан хэрэглээндээ хэвшүүлэн ногоон ажлын байртай болох үйл ажиллагааг манлайлахыг тус яамны  Цэвэр технологи, хөрөнгө оруулалт, үйлдвэрлэлийн хэлтсийн  дарга Ц.Уранчимэг уриалсан юм.  Аяны  хүрээнд БОАЖЯ-ны ажилчин, албан хаагчдын дунд “Ногоон хөгжил” илтгэлийн уралдаан зарлаж дүгнэсэн бөгөөд уралдааны шилдгээр шалгарсан Ойн бодлого зохицуулалтын газрын мэргэжилтэн Ц.Банзрагч “Ногоон хөгжилд иргэдийн оролцоо хамгийн чухал нь. Төрийн байгууллага гэлтгүй иргэд өөрсдийн хийж буй үйл ажиллагаандаа байгаль эхээ гэсэн сэтгэлээр хандаж хувь нэмрээ оруулах ёстой.

Бид халуун ус гоожуулдаг шүршүүртэй болбол нэг жилд 150 кг СО2, хашаа байшингийн дулаалгаа бүрэн шийдсэн тохиолдолд жилд 2000 кг СО2-г бууруулна. Бидэнд тулгамдаад байгаа гол асуудал болох хүлэмжийн хийг энэ мэтчилэн жижиг зүйлсээс эхлэн бууруулж болно. Ингэснээр бидний хэлээд байгаа “Ногоон хөгжил”-ийн суурь зөв тавигдана. Хамгийн чухал нь бид иргэдийн оролцоог нэмэгдүүлэх шаардлагатай. Энэ мэтчилэн арга хэмжээг шат дараалалтай үр дүнтэй авч ажиллавал 2030 он гэхэд хүлэмжийн хийг 14 хувиар бууруулж чадна”  хэмээсэн юм.

ХОЛБООТОЙ МЭДЭЭ
МЭДЭЭНИЙ СЭТГЭГДЭЛ

АНХААРУУЛГА:Уншигчдын бичсэн сэтгэгдэлд mminfo.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99998796 утсаар хүлээн авна.