ОУХБХ-ны футзалын шүүгчийн сургалт эхэллээ

ОУХБХ-ны футзалын шүүгчийн сургалт эхэллээ

Монголын Хөлбөмбөгийн Холбооны футзалын шинэ улирал 12-р сарын 21-нд “Сонирхогчдын цом” тэмцээнээр нээлтээ хийнэ. Тэгвэл МХБХ, тэр дундаа холбооны шүүгчид шинэ улирлын бэлтгэлээ нягт нямбай базаасаар байна.

Шүүгчдийн хамрагддаг хамгийн өргөн цар хүрээтэй, өндөр ач холбогдолтой ОУХБХ-ны футзалын шүүгчийн сургалт /FIFA Futsal refereeing course/ өнөөдөр эхэлсэн нь үүний нэг жишээ юм.

Сургалтын нээлтэд МХБХ-ны Ерөнхийлөгчийн Зөвлөх Ш.Жаргалсайхан, Шүүгчийн хэлтсийн дарга Д.Түмэнбаяр, Тэмцээн Зохион Байгуулах хэлтсийн дарга С.Жаргал, Гадаад Харилцааны Захирал С.Монголжингоо болон АХБХ-ны сургагч багш Бадрул Хишам Калам, Мохамед Родзали Якоб нар оролцлоо. Мөн МХБХ-ны Шүүгчийн Хорооны дарга Б.Гантиг хүрэлцэн ирж шүүгч нарт амжилт хүслээ.

АХБХ-ны футзалын элит шүүгч, АХБХ-ны шүүгчийн сургагч багшийн гэрчилгээтэй Р.Жаргалсайхан энэ удаагийн сургалтыг удирдан явуулж байгаараа онцлогтой болж байна. Анх удаа Монгол шүүгч АХБХ-ны мэргэжилтнүүдийн заавартайгаар дотоодын шүүгчиддээ ОУХБХ-ны шүүгчийн сургалтыг зааж байгаа нь цаашид нээгдэх олон боломжийн эхлэл гэдгийг мэргэжилтнүүд онцолж байв.

Энэхүү сургалтаар МХБХ-ны шүүгчдээс онол, практикийн шалгалт авах ба үүний дүнд шүүгчдийн зэргийг шинэчлэн олгох аж. ОУХБХ-ны Азийн шүүгчийн хөгжил хариуцсан мэргэжилтэн Мохамед Родзали Якоб МХБХ-ны шүүгчдийн хэлтсийн үйл ажиллагаа, ирээдүйн төлөвлөгөөтэй танилцаж, заавар зөвлөгөө өгч буйг дурдах нь зүйтэй биз ээ.

Сургалт зохион байгуулж буй сургагч багш нарт болон оролцогч шүүгчиддээ амжилт хүсье.

ХОЛБООТОЙ МЭДЭЭ
МЭДЭЭНИЙ СЭТГЭГДЭЛ

АНХААРУУЛГА:Уншигчдын бичсэн сэтгэгдэлд mminfo.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99998796 утсаар хүлээн авна.