Бодлогогүй төрийн буруу бодлогын эсрэг бизнес эрхлэгчид нэгдэж эхэлжээ. Тодруулбал, Валютын сангаас авах зээлээс үүдэж долоон төрлийн татвар нэмж буйг татвар төлөгч аж ахуйн нэгжүүд эсэргүүцэж улмаар МХАҮТ-аас уриалга гаргасан байна.

Уг уриалгад хэрвээ найман асуудлыг Засгийн газар биелүүлэхгүй бол НӨАТ, Аж ахуйн нэгжийн орлогын албан татвар, нийгмийн даатгалын татвараа тус тус төлөхгүй байхыг уриалсан байна.

Тус танхимаас Засгийн газарт 2017 оны баталсан төсвийн зардлыг нэмэгдүүлэхгүй байх, Төрийн захиргаа болон үйлчилгээний албан хаагчдын тоог 10-20 хувь бууруулах.

Мөн албан хаагчдын шаардлагагүй тэтгэмж, дэмжлэгийг зогсоох, нийгмийн даатгалын шимтгэлийг нэмэгдүүлэхгүй байх, Хувь хүний орлогын албан татварыг нэмэгдүүлэхгүй байх, Үнэ тогтворжуулах нэрийн дор Онцгой албан татварын тухай хуульд оруулсан нэмэлт өөрчлөлт буюу нэг ам.долларыг 1450 төгрөгөөр тогтоосон татварын хэмжээг хүчингүй болгохоос гадна тодорхой салбаруудад дэмжлэг үзүүлэхийг шаарджээ.

Мөн төрөөс татаас авч буй Төрийн өмчит компаниудыг хувьчлах, хувьцаат компани болгох, эс бөгөөс татан буулгах ёстой гэж бизнес эрхлэгчид үзэж байгаа бөгөөд тэтгэврийн насыг нэмэгдүүлсэн нь ч төрийн буруу бодлого хэмээн мэдэгдлээ.

МХАҮТ-ын ерөнхийлөгч Б. Лхагважав хэлэхдээ “Бизнес эрхлэгчидтэй холбоотой чамгүй олон асуудлыг хаврын чуулганаар хэлэлцэнэ. Тэр дундаа татвар нэмэх асуудлыг хэлэлцэнэ. Эдгээр шаардлагыг биелүүлэхгүй бол бид аж ахуйн нэгжүүдийг татвараа төлөхгүй байхыг уриална” гэв.