Монгол Улсын Их хурлаас  баталсан Монгол хэлний тухай шинэ хуулийн үзэл санаа нь иргэн бүр хуучин монгол бичгээрээ уншиж, бичиж чаддаг байх төдийгүй 2025 оны нэгдүгээр сарын 01-нээс эхэлж, төрийн бүх албан байгууллага  албан бичиг хэргээ кирилл болон үндэсний монгол бичгээр хослуулан хөтлөх зэрэг олон чухал заалтыг тусгасан билээ. Тэгвэл “Аймгаараа хүмүүн бичигтэн, Монгол бичигтэн” болох  уриалгыг Говьсүмбэр аймгийн ЗДТГ-ын хамт олон хүлээн авч, нэгдээд буй.

Түүнчлэн тус аймгийн Сүмбэр сумын I сургуулиас Монгол Улсын Гавьяат багш Н.Түмэн-Өлзийгийн нэрэмжит “Монгол бичиг мину” олимпиадыг өнгөрсөн баасан гарагт зохион байгуулсан юм. Ерөнхий боловсролын сургуулийн сурагчид, багш, сурган хүмүүжүүлэгчид, иргэдийн үндэсний бичгийн соёлтой хэрэглээг бий болгох, сурах урам, сонирхлыг төрүүлэх зорилготой энэхүү олимпиадыг нээж, аймгийн Засаг дарга Г.Батсуурь үг хэлсэн юм. Тэрбээр “Монголчуудын оюун ухааны гайхамшиг, дэлхийн соёлын санд тод мөрөө үлдээсэн, тэнгэр газар хоёрыг учруулан холбосон, тэнгэр заяат түмний босоо бичгээ газар сайгүй сурах, сурснаа бататгах олон төрлийн ажил улс орны өнцөг булан бүрт эрчимтэй өрнөж байна.

Энэхүү ажил манай аймагт өрнөж байгаагийн нэг жишээ нь энэхүү олимпиад юм. Энэ ажлыг зохион байгуулахад биечлэн оролцсон аймгийн Боловсрол, соёл урлагийн газар, Сүмбэр сумын I сургуулийн удирдлага, багш нартаа цаашдын ажилд нь амжилт хүсье. Уламжлалт олимпиадад оролцохоор ирсэн аймгийн сургуулиудын болон сум, баг, байгууллагын оролцогчдод өндөр амжилт хүсье. Энэ олимпиад маань аймгийн төдийгүй бүс нутгийн ард иргэдийн асууж, сурагладаг нэр хүндтэй үндэсний ухамсар соёлоо дээдэлсэн уралдаан, соёлын үйл ажиллагаа болсонд аймгийн удирдлага бид бүрэн дэмжиж, цаашид хамтран ажиллах болно” гэв.

Тус аймагт Монгол Улсын Засгийн газраас ойрын дөрвөн жилд хос бичигтэн болох зорилтын хүрээнд үндэсний бичгээ сурах, сурталчлах, 2025 он гэхэд хос бичигтэн болох бэлтгэл хангах олон төрлийн ажил зохиогдож байгаагийн нэг нь МУГБ Н.Түмэн-Өлзийгийн нэрэмжит үндэсний бичгийн олимпиад юм байна. Уг олимпиадыг 13 дахь жилдээ амжилттай зохион байгуулж байгаа аж. Олимпиадад оролцож буй 6-12 дугаар ангийн сурагчдын үндэсний бичгийн гүнзгийрүүлсэн ухагдахуун, ойлголтыг шалгасан бол мэргэжлийн багш нарын төвшинд мэргэжлийн өндөр төвшний ойлголт, цахим бичвэр, уран, эвхмэл, таталган тиг бичвэрийн даалгавруудыг гүйцэтгүүлсэн юм.

Харин бага ангийн багш нар мэргэжлийн дунд төвшин, уран, эвхмэл бичвэрээр өрсөлдсөн бол иргэд бийрийн бичгийн тиг бичвэр, бичлэг, уншлагаар өрсөлдөв.

Энэ үеэр тус аймгийн Сүмбэр сумын I сургуулийн багш Л.Лоохууз “Монгол Улсын Ерөнхийлөгчийн 2005 оны зарлигаар жил бүрийн тавдугаар сарын эхний ням гарагийг бичиг соёлын өдөр болгохоор тогтоож, эдүгээ 12 жилийг ардаа орхиод байна. Өнгөрсөн хугацаанд манай аймгийн боловсрол, соёлын байгууллагууд хамтран олон сайхан ажил зохион байгуулдаг уламжлалтай болсон билээ.

Энэ жил 13 дахь удаагаа зохион байгуулагдаж буй олимпиадад маань нийт 300 гаруй хүн оролцож, 10 төрөлд өрсөлдөнө. Тодруулбал, VI-XII ангийн сурагчид, мэргэжлийн багш нар, бага ангийн багш нар болон иргэд гэсэн 10 ангилалд явагдах юм” гэв. Тус олимпиадыг 2003 оноос эхлэн МУГБ Н.Түмэн-Өлзийгийн нэрэмжит болгон зохион байгуулсан түүхтэй гэнэ. МУГБ Н.Түмэн-Өлзий монгол хэл, уран зохиолын багш бөгөөд өндөр насны тэтгэвэрт суугаад байгаа хэмээн олимпиад зохион байгуулагчид онцолж байлаа. Олимпиадад оролцогчдыг оноогоор жагсааж, төрөл бүрт эхний гурван байрын эзнийг шалгаруулсан юм.

Тухайлбал, VI ангийнхнаас I, II, III байрт V сургуулийн сурагчид шалгарсан бөгөөд эхний гурван байрыг Марал, Ариунболор, Хонгорзул нар эзэлсэн бол VII дугаар ангийнхнаас I байрт Сүмбэр сумын I сургуулийн сурагч Пунцагхорлоо, II байрт V сургуулийн сурагч Бэрцэцэг, III байрт II сургуулийн сурагч Алтанцэцэг нар шалгарчээ. Мөн VIII ангийнхнаас I байрт II сургуулийн сурагч О.Соёлмаа, II байрт V сургуулийн сурагч С.Туяацэцэг, III байрт V сургуулийн сурагч Э.Бямбасүрэн, IX ангийнхнаас I байрт II сургуулийн сурагч Одонтуяа, II байрт I сургуулийн сурагч Номин, III байрт I сургуулийн сурагч Мөнххүлэг, X ангийнхнаас I байрт II сургуулийн сурагч Дөлгөөн, II байрт I сургуулийн сурагч Содхүү, III байрт I сургуулийн сурагч Энхзул,  XI ангийнхнаас I байрт I сургуулийн сурагч Болорчимэг, II байрт I сургуулийн сурагч Б.Оюунгэрэл, III байрт V сургуулийн сурагч М.Анударь, XII ангийнхнаас I байрт I сургуулийн сурагч Б.Болортуяа, II байрт I сургуулийн сурагч С.Мөнхжин, III байрт II сургуулийн сурагч О.Сэцээдарь нар шалгарч, тэргүүлсэн сурагчдад алт, мөнгө, хүрэл медаль, өргөмжлөл, мөнгөн шагналыг гардуулсан юм.  

Харин багш нарын төрөлд I байрт V сургуулийн багш Э.Олонцэцэг, II байрт II сургуулийн багш Б.Цэвэлсүрэн, III байрт V сургуулийн багш Ц.Мөнхтөгс нар шалгарсан бол бага ангийн багш нарын төрөлд I байрт III сургуулийн багш Б.Цолмон, II байрт I сургуулийн багш Б.Лхагвасүрэн, III байрт IV сургуулийн багш Д.Өсөхбаяр нар шалгарчээ. Түүнчлэн иргэдээс I байрт Политехник коллежийн оюутан Б.Маралмаа, II байрт II сургуулийн Англи хэлний багш Б.Соёл-Эрдэнэ, III байрт Политехник коллежийн багш Ж.Батбилэг нар шалгарч, алт, мөнгө, хүрэл медаль хүртлээ.