Нийслэлийн хэмжээнд нийтийн тээврийн үйлчилгээ үзүүлж буй том оврын автобусанд шалгалт хийжээ. Тодруулбал, Тээврийн прокурорын газраас "Зорчигч тээврийн нэгтгэл” ОНӨӨАТҮГ-т шалгалт хийсэн аж.

 Хяналт, шатгалтад нэгтгэлийн автобус I, III  баазын тухайн өдөр үйлчилгээнд гарах 214 автобуснаас 133 автобусыг хамруулжээ. Шалгалтын үеэр хурд хэмжигч ажиллахгүй 49, хяналтын камер ажиллагаагүй хоёр, тоормозны гэрэл ажиллагаагүй ес, улсын дугаар бүдэг 14, цацруулагчгүй 10, үйлдвэрийн бус төмөртэй гупертэй 26, өөр өнгийн гэрэл, нэмэгдэл лед гэрэлтэй дөрөв, улсын дугаарын гэрэл асахгүй гурван автобус илэрсэн аж.

Түүнчлэн салхины шил хагархай нэг, цонхны шил цуурсан, автобусны оврын гэрэл асахгүй зэрэг зөрчлийг илрүүлсэн гэнэ.

Тус шалгалтын дүнгийн хүрээнд Нийслэлийн Зорчигч тээврийн нэгтгэл ОНӨААТҮГ, Нийслэлийн нийтийн тээврийн газарт прокурорын мэдэгдэл хүргүүлэхээр шийдвэрлэсэн байна.