Нийслэлийн хэмжээнд үйл ажиллагаа явуулж буй ерөнхий боловсролын сургуулиудад Нийслэлийн мэргэжлийн хяналтын газраас шалгалт хийжээ.

Шалгалтыг энэ сарын 9-нд Нийслэлийн мэргэжлийн хяналтын газрын Эрүүл мэнд, боловсрол, соёлын хяналтын хэлтэс, Байгаль орчин, геологи, уул уурхайн хяналтын хэлтэс, Байгаль орчин аялал, жуулчлалын яамны хүрээлэн буй орчин байгалийн нөөцийн удирдлагын газар, Нийслэлийн Онцгой байдлын газар, Нийслэлийн Цагдаагийн газартай хамтран хийсэн аж.

Шалгалтаар ЕБС-ийн химийн хичээлд ашигладаг зарим химийн бодисын хугацаа нь дууссан, нэр, найрлага, үйлдвэрлэсэн газрын хаяг тодорхойгүй, ашиглалтын болон хадгалалтын горим алдагдсан зэрэг зөрчил илэрсэн байна. Зөрчилтэй химийн урвалж, бодисуудыг хурааж, НОБГ-ын харъяа “Аврах тусгай анги”-ийн хашаанд байрлах “Химийн бодисын хаягдлыг түр агуулах”-д түр хадгалахаар болжээ.