Зам тээврийн осол гэмтэл нь нийгмийн эрүүл мэндийн тулгамдсан асуудлын нэг байсаар байна. Дэлхий дахинд зам тээврийн осол, гэмтлийн улмаас жилд 1.2 сая хүн амь насаа алдаж, 50 гаруй сая хүн гэмтэж, бэртдэг байна.

Харин Монгол Улсын хувьд 2010-2015 онд осолд гэмтлийн өвчлөл, нас баралт жил бүр нэмэгдэж, хүн амын өвчлөлийн  тавдугаарт, нас баралтын гуравдугаарт орсоор байгаа юм.

Өнгөрсөн жил гэхэд Монгол Улсын хэмжээнд 46712 зам тээврийн осол бүртгэгджээ. Харин Улаанбаатар хотод 41375 буюу 88.6 хувь нь бүртгэгдсэн аж.

Мөн 2016 онд Монгол улсын хэмжээнд бүх төрлийн гэмт хэргийн улмаас 880 хүний амиа алдсан байна. Үүнээс 45.3 хувь нь Тээврийн хэрэгслийн хөдөлгөөний аюулгүй байдал, ашиглалтын журмын эсрэг гэмт хэргийн улмаас амь насаа алдсан хэмээх судалгаа гарчээ.

Тиймээс Нэгдсэн Үндэстний Байгууллагаас замын хөдөлгөөний аюулгүй байдлыг дэмжих дөрөв дэх удаагийн долоо хоногийг энэ сарын 8-15-ний хооронд  “Хурдаа хасч- Амь насаа аваръя” нэгдсэн уриан дор зохион байгуулж байна. Тус өдрийг Эрүүл мэндийн яам, Зам, тээврийн хөгжлийн яам, Дэлхийн эрүүл мэндийн байгууллага, Нэгдсэн үндэстний байгууллагын Хүүхдийн сан, Нийслэлийн боловсролын газар,Замын цагдаагийн алба, Нийгмийн эрүүл мэндийн үндэсний төв, Гэмтэл согог судлалын үндэсний төв, Азийн хөгжлийн банк, Монголын улаан загалмайн нийгэмлэг болон бусад холбогдох байгууллагууд хамтран замын хөдөлгөөнд оролцогсдын аюулгүй байдлыг хангах, хурд хэтрүүлэх зөрчлийн хор уршиг, аюулын талаарх хүн амын мэдлэг, хандлагыг өөрчлөн зохистой зан үйлийг төлөвшүүлэх зорилгоор зохион байгуулжээ.

Долоо хоногийн хүрээнд ХСИС-ийн 300 сонсогч нарт “Замын аюулгүй байдлын хангах 7 хоногийн хүрээнд сургалт хийх,

21 аймаг есөн дүүрэгт Замын аюулгүй байдлын талаар мэдээлэл өгөх, нийтийн тээврийн автобусанд Замын аюулгүй байдлын 7 хоногийн талаар уриа бүхий баннер байршуулах, хотоос гарах товчоонуудад Хурд хэтрүүлэхээс сэргийлсэн самбар байршуулах зэрэг ажлыг зохион байгуулахаар төлөвлөжээ.