Замын цагдаагийн албаны ЖШУХ-т өчигдөр нийт 388 дуудлага, мэдээ мэдээлэл иржээ. Үүнээс зам тээврийн ослын 307 дуудлага бүртгэгдсэн бөгөөд ослын улмаас зургаан хүн хүнд, хөнгөн байдлаар гэмтсэн аж.

Тодруулбал, Баянзүрх дүүргийн Амгалангийн төмөр замын гарамын замд S.Legacy маркийн автомашины жолооч Ж согтууруулах ундааны зүйл хэрэглэсэн үедээ тээврийн хэрэгсэл жолоодож T.Specio маркийн автомашинтай мөргөлдсөн байна. Ослын улмаас хоёр зорчигч гэмтсэн аж. Уг хэргийг үргэлжлүүлэн шалгаж байгаа юм байна. Мөн Цагдаагийн байгууллагын хяналт шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон нийт 47 жолоочийг илрүүлж гарч болзошгүй осол, хэргээс  урьдчилан сэргийлж ажилсан тухай мэдээллээ.

Согтууруулах ундааны зүйл хэрэглэсэн үед автомашин жолоодох нь жолооч хурд хэтрүүлэх, гэрэл дохио болон өөдөөс ирэх саадыг анзаарахгүй, зогсоох арга хэмжээ авч чадахгүй, анхаарал төвлөрөхгүй байх зэргээр өөрийгөө хянах чадварт муугаар нөлөөлж ноцтой зам тээврийн осол гарах үндэс болдог байна.

Тиймээс архи, согтууруулах ундааны зүйл хэрэглэсэн үедээ тээврийн хэрэгсэл жолоодохоос татгалзаж, өөрийн болон бусдын амь нас, эрүүл мэндийг хамгаалахыг Замын цагдаагийн албанаас анхаарууллаа.