УИХ-ын гишүүн, Засгийн газрын хэрэг эрхлэх газрын дарга Ж.Мөнхбат өнөөдөр Эдийн засгийн чуулга уулзалттай холбогдуулан сэтгүүлчдэд мэдээлэл хийлээ. Тэрбээр мэдээллийн эхэнд “Монголын эдийн засгийн форум-2017” чуулга уулзалтыг ирэх зургадугаар сарын сүүл болон долдугаар сарын эхээр зохион байгуулахаар болсон гэдгийг онцолсон юм.

Чуулганы тов хоёр удаа хойшилж байгаа юм. Тодруулбал, жил бүрийн хавар уламжлал болгон зохион байгуулдаг тус чуулган өнгөрсөн гуравдугаар сарын 30, 31-нд болох байсан ч тавдугаар сарын 18, 19-нд болгон хойшлуулсан юм.

Харин дээрх хугацааг дахин ирэх зургадугаар сарын сүүл хүртэл болгон дахин тов зарлалаа.

Харин эдийн засгийн чуулга уулзалтын товыг хойшлуулах болсон шалтгааныг Олон улсын валютын сантай холбон тайлбарлав.  Мөн Ерөнхийлөгчийн сонгууль болж буй тул ирэх сард улстөржилт үүсэх эрсдэлтэй, нөгөө талаар тус форумыг илүү өгөөжтэй, үр дүнтэй болгох гэдэг шаардлагаар сонгуулийн дараа хийх нь илүү оновчой гэж үзсэн хэмээн тайлбарлалаа.