Замын цагдаагийн албаны ЖШУХ-т өчигдөр нийт 329 дуудлага, мэдээ мэдээлэл иржээ. Үүнээс  зам тээврийн ослын 243 дуудлага бүртгэгдсэн байна. Осол, хэргийн улмаас 15 хүн хүнд, хөнгөн байдлаар гэмтсэн талаар Замын цагдаагийн албанаас мэдээллээ. Мөн бага насны зургаан хүүхэд зам тээврийн осолд өртсөн байна. 

Тодруулбал, Чингэлтэй дүүрэгт байрлах Дэнжийн мянгын гудамжинд марк, улсын дугаар тодорхойгүй автомашины жолооч нь явган зорчигч есөн настай М-г мөргөж гэмтээсэн хэрэг гарчээ.

Харин орон нутгийн замд хоёр хүний амь хохирсон хэрэг гарсан байна. Хэргийн талаар тодруулахад, Увс аймгийн Түргэн сумын нутаг Рашаант гэх газар асфальтан замд ВАЗ-21099 маркийн К жолоочтой автомашин онхолдож зорчигч М, Б нарын хоёр хүний амь эрсэджээ. Уг хэргийг Увс аймгийн Цагдаагийн газарт үргэлжлүүлэн шалгаж байгаа юм байна. Тиймээс замын хөдөлгөөнд анхаарал болгоомжтой оролцохыг Замын цагдаагийн албанаас анхаарууллаа.