Замын цагдаагийн албаны ЖШУХ-т өчигдөр нийт 351 дуудлага, мэдээ мэдээлэл ирсэн байна. Үүнээс зам тээврийн ослын 263 дуудлага бүртгэгдсэн бөгөөд осол, хэргийн улмаас найман хүн хүнд, хөнгөн байдлаар гэмтжээ. Мөн гурван хүүхэд зам тээврийн осолд өртсөн байна.

Тодруулбал, Чингэлтэй дүүргийн Сурагчийн 81 дүгээр гудамжинд есөн настай Т нь унадаг дугуй унаж,  хөдөлгөөнд оролцохдоо T.Allion маркийн автомашинтай шүргэлцэж, улмаар гэмтсэн талаар Замын цагдаагийн албанаас мэдээллээ. Мөн Баянгол дүүрэгт байрлах гуравдугаар эмнэлэгийн баруун урд замд 15 настай Т нь унадаг дугуй унаж яваад машин шүргүүлж, гэмтсэн хэрэг гарчээ. Энэ оны оны эхний дөрвөн  сарын байдлаар унадаг дугуй унаж замын хөдөлгөөнд оролцох үедээ зам тээврийн осолд холбогдож амь нас нь хохирсон дөрвөн хэрэг бүртгэгдсэн байна.

Үүний гурав нь орон нутагт, нэг нь нийслэл хотод бүртгэгджээ. Түүнчлэн Нийслэлийн хэмжээнд гэхэд зам тээврийн ослын улмаас 28 хүүхэд хүнд хүндэвтэр байдлаар гэмтсэний хоёр нь унадаг дугуйтай замын хөдөлгөөнд оролцож байх үед гэмтсэн аж. Тиймээс Замын цагдаагийн албанаас дараах дараах сэрэмжлүүлгийг хүргэлээ.

• -Эцэг эх та 14 нас хүрээгүй хүүхдийг унадаг дугуйтай замын хөдөлгөөнд оролцуулахгүй байх,
• -Унадаг дугуй унаж замын хөдөлгөөнд оролцогч та ямагт анхаарал болгоомжтой байж, жолоочид харагдахуйц тод эсвэл цацруулагчтай хувцас өмсөх. Мөн хамгаалах малгай болон бусад хамгаалах хэрэгслийг бүрэн өмсөж хэрэглэн хөдөлгөөнд оролцох,
• -Жолооч нарт ойлгогдохуйц анхааруулах болон эргэх дохио өгөх зэрэг арга хэмжээ авахыг сэрэмжлүүлж байна.