Өчигдөр шөнийн үүрээр 04.00 цагийн үед Олон улсын валютын сан хуралдаж Монгол Улсын “Өргөтгөсөн санхүүжилтийн хөтөлбөр”-т хамрагдах хүсэлтийг хүлээн авсан билээ.

Тодруулбал, шийдвэр 06.00 цагийн орчим эцэслэн гарч, 24 улс орны захирлууд санал нэгтэйгээр дэмжсэнийг өнөөдөр олон нийтэд мэдээлсэн юм. Тодруулбал, 14.00 цагт Сангийн яамны сайд Б.Чойжилсүрэн, дэд сайд Х.Булгантуяа, Монголбанкны Дэд Ерөнхийлөгч Б.Лхагвасүрэн, тэргүүн дэд Ерөнхийлөгч О.Эрдэнэбилэг, ОУВС-ийн Монгол дахь суурин төлөөлөгч Нэйл Сакер нарын албан тушаалтнууд хөтөлбөр албан ёсоор хэрэгжиж эхэлснийг олон нийтэд зарлаж мэдээлэл хийлээ.

Энэхүү хөтөлбөр хэрэгжиж эхэлснээр Монгол Улс 5.5 тэрбум ам.долларын зээл авах эрх нь нээгдэх учиртай. Эдийн засгийн амаргүй цаг үед, төсвийн тодотголоо яаралтай хийж, алдагдлаа хангалттай хэмжээнд бууруулж, маш зоригтой шийдвэр гаргасан Монгол Улсын Засгийн газрыг үнэлж буйгаа Валютын сангийн суурин төлөөлөгч Нэйл Сакер онцолж байсан юм.

Тэгвэл Сангийн сайд Б.Чойжилсүрэн “ Хөтөлбөр гурван жилийн хугацаатайгаар хэрэгжих  бөгөөд нийт 5.5 тэрбум ам.долларын санхүүжилт орж ирнэ. Зөвхөн ОУВС гэхэд 434.3 сая ам.долларын санхүүжилтээр дэмжинэ. Эхний санхүүжилт болох 38.6 сая ам.доллар тун удахгүй орж ирнэ. Хөтөлбөрийн гол зорилго нь эдийн засгийг сайжруулах, сэргээх, төсвийн тогтвортой байдлыг хангахад чиглэгдсэн” хэмээн мэдэгдсэн. Тэгвэл эхний ээлжийн санхүүжилт болох 38.6 сая ам.доллар Монголбанкны дансанд албан ёсоор орж ирснийг Төв банкны эх сурвалж мэдээллээ. Валютын сангийн өгч буй энэхүү мөнгөөр Төв банкны валютын нөөцийг нэмэгдүүлэх учиртай.