“Боловсрол суваг” телевиз болон “Номандс групп” хамтран “Эндемол Шайн”  группийн албан ёсны эрхтэйгээр “Яг түүн шиг” шоуг хоёр дахь удаагаа амжилттай зохион байгууллаа.

Тус шоуны хоёрдугаар улирлын 10 дугаар өчигдөр болж, ялагчаар “Х түц” продакшны жүжигчин Т.Бархүү шалгарлаа. Тэрбээр шоуны туршид олон гайхалтай үзүүлбэрийг үзүүлэн үзэгчдийг байлдан дагуулж, гурван ч дугаарын ялагчаар тодорсон. Харин тэмцээний финалын шатанд алдарт “Aerosmith” хамтлагийн дуучин Steven Tyler болж, “Яг түүн шиг-2” шоуны тайзыг доргиолоо. Ийнхүү шүүгч, үзэгч, оролцогчоос нийт 54 оноо цуглуулснаар “Яг түүн шиг-2” шоуны ялагч болсон юм.

Энэ үеэр“Х түц” продакшны жүжигчин Т.Бархүү  “Та бүхэнд маш их баярлалаа. Ийм үед хэлэх үг олддоггүй юм байна. Энэ бол хүний амьдралд тохиолдох маш ховор боломж, ховор тохиолдол. Энэхүү сайхан боломжийг олгож өгсөн “Боловсрол” телевизийн хамт олонд маш их баярлалаа хэмээн мэхийн ёслоё. “Яг түүн шиг” тэмцээнд оролцохын тулд би бусдад танигдсан байх ёстой байсан болов уу.

Намайг урьж, ажилд авсан “Х түц” продакшн, найруулагч Найдандоржид баярлалаа. Хэрвээ би “Х түц” продакшнд ороогүй бол энд ингээд зогсохгүй байлаа. Гэхдээ нэг зүйлийг онцлон хэлэхэд, онооны шүүлтэд Онон ах маань надад хэзээ ч тал засдаггүй байсан шүү. Та бүхэн үүнийг зөвөөр ойлгоорой. Мөн намайг энэ хорвоод намайг төрүүлсэн ээж, аавдаа маш их баярлалаа. Би энэ хорвоод мэндлээгүй байсан бол энэ зэрэгтэй явахгүй байсан. Аав минь тэнгэрийн орноос харж байгаа байх.

Өнөөдөр энэхүү тайзан дээр зогсоод та бүхэнд ийм гайхалтай үзүүлбэр үзүүлэхэд тусалж, дэмжиж байсан хүнд тийм ч олон удаа хайртай шүү гэж зоригтой хэлж байгаагүй. Гэхдээ Монголын ард түмнийхээ өмнө хэлье. Миний хамгийн шилдэг туслагч, надаас ч илүү нойргүй хонож байсан Одончимэгтээ баярлалаа. Чамдаа маш их хайртай шүү. Би маш сайн сайхан зүйлсийн төлөө үлдсэн амьдралдаа чамтайгаа хамт зүтгэнэ. Би чамдаа хайртай. Чинийхээ төлөө, охиныхоо төлөө, амьдралынхаа төлөө зүтгэнэ. Намайг дэмжсэн Монголынхоо ард түмэнд маш их баярлалаа” гэв.

Ялагчийн шагналыг “Яг түүн шиг” шонуы ерөнхий продюсер, “Номадс” группийн ерөнхийлөгч М.Есөнмөнх, Непко компанийн захирал Б.Баабар нар гардууллаа. Энэ үеэр “Яг түүн шиг” шонуы ерөнхий продюсер, “Номадс” группын ерөнхийлөгч М.Есөнмөнх “Шоуг зохион байгуулахад хамтран ажилласан хүмүүст баярлалаа. Мэдээж аливаа шоу, нэвтрүүлэг санхүү мөнгөгүй бол амилахад хэцүү байдаг. Хамтран ажилласан Юнител групп, Голомт банк, Төрийн банк, Түшиг группийн удирдлагуудад баярлалаа. Энэхүү шоуг зохион байгуулахад нийт 300 гаруй хүн оролцсон байна.

Оролцогчид маань 70 өдрийн турш дэлхийн алдар цуутай 70 гаруй олны танил эрхмүүдийн дүрд хувирчээ. Ингээд ялагчийн шагналыг гардуулъя” гэлээ. “Яг түүн шиг-2” шоуны ялагч Т.Бархүү “Яг түүн шиг” шоуны Ялагчийн цом болон 20 сая төгрөгийн эзэн болсон юм.  Мөн ивээн тэтгэгч байгууллагууд Британика нэвтэрхий толийн есөн боть, Юнител группийн 8888 цаглашгүй хэрэглээний дугаар, бүтэн жилийн хэрэглээний хамт, Кларинс спа брэндийн 1.500 мянган төгрөгийн эрхийн бичиг, Төрийн банкны дансандаа 500 мянган төгрөгтэй юниан пэе платинум картыг бэлэглэлээ. Дашрамд сонирхуулахад, шоуны үеэр “Нэпко” компанийн захирал Б.Баабар Британика нэвтэрхий толийн дараагийн ботид жүжигчин Т.Бархүүгийн намтарыг оруулна хэмээн мэдэгдэв.