“Дэлхийн бяцхан мисс”-ийг Монголоос төрүүлж, тэр дундаа орон нутагт нь хөгжүүлж бэлтгэсэн Сэлэнгэ аймгийн Сүхбаатар сумын улсын тэргүүний II сургуулийн багш Ч.Мягмартай ярилцлаа.

 -Сэлэнгэ аймгаас анх удаа “Дэлхийн бяцхан мисс” төрлөө. Таны бэлтгэсэн шавь нар энэ жил  их өнгөлөг, амжилттай байна. Та манай уншигчдад өөрийгөө  танилцуулахгүй юу?

-Би Сэлэнгэ аймгийн Түшиг суманд төрж, МУИС-ийг урлаг судлаач мэргэжлээр төгсөн   сумандаа хөгжмийн багш, нийгмийн ажилтан хийж байгаад 2010 онд МУБИС-д нийгмийн ажилтнаар магистр хамгаалсан. Улсад 21 жил багшилж байна. Нийгмийн ажилтнаар 12 жил ажиллахдаа олон хүүхдийн хөгжил төлөвшил, хүмүүжилд нөлөөлж тусалж, дотны анд нь болсон. 2016 оны намраас би Сүхбаатар сумын II сургуульд нийгмийн ажилтан, багшаар ажиллаж байна.

-Таны бэлтгэсэн шавь “Дэлхийн бяцхан мисс” болжээ. Таны хувьд нэлээн шаргуу ажилласан байх?

-“Бяцхан мисс” ОУХБ-аас Орхон аймагт зохион байгуулсан “Бяцхан мисс” тэмцээнд сургуулиасаа Ж.Сувд, Хосзул, Анхсувд гээд хоёрдугаар ангийн охид, IV цэцэрлэгийн А.Хулан нарыг бэлтгэн оролцуулсан юм. Гурван охин маань шагналт байр, Ж.Сувд “Авьяаслаг мисс”-ээр тодрон “Дэлхийн бяцхан мисс” шалгаруулах тэмцээнд оролцох урилга авсан. Гүрж улсын Батуми хотод дөрөвдүгээр сарын 17-24-нд болсон “Дэлхийн бяцхан мисс” шалгаруулах тэмцээнд манай сургуулийн 2б ангийн сурагч Ж.Сувд оролцож шалгарлаа. Эцэг эх нь цалингийн зээл хүртэл аваад хүүхдээ маш сайн дэмжсэн. Миссээ бэлтгэх гээд нэг хэсэг цаг наргүй ажилласан даа. Миний эзэмшсэн урлаг судлаач мэргэжил маань их хэрэг болсон. Бүх өнцгөөс нь харж ажлаа төлөвлөсөн. Эх орноо сурталчилсан танилцуулга клип хийх, зохиолоо бичих, дизайнар олох, загварын чиг хандлагаа тодорхойлох, урлагийн ямар тоглолт хийх вэ гээд олон талаас нь бодож зүтгэсэн. Үүний хүчинд бид амжилт гаргаж чадлаа. Хүүхдийн төлөө ажиллахад багш нарт сэтгэл зүтгэл чухал. Дээр нь олны дэмжлэг байхад болохгүй, бүтэхгүй ажил гэж үгүй.

-Төрийн өмчит сургууль, цэцэрлэгийн эмч, багш нарын цалингийн зээлийн хүүг бууруулж, шимтгэлгүй болгосон. Сайхан мэдээ биш гэж үү?

-Үнэхээр сайхан мэдээ байна.Эцэг эх,  багш нар цалингийн зээлээр хүүхдээ хөгжүүлэх гэж зорьдог. Улс орны ирээдүй болсон хүүхдүүдийн төлөө сэтгэл, амьдралаа зориулан яваа багш нарын амьдралыг жаахан ч гэсэн төрөөс дэмжиж байгаад баяртай байна. Миний хувьд хүүхдүүдийнхээ төлөө цаг наргүй л ажилладаг. Эргээд амьдралаа харахад хөлсний байранд л аж төрж байна. Гэлээ гээд сэтгэлээр унаж гутардаггүй. Над шиг амьдралтай багш Монголд зөндөө байгаа. Нэгэнт сонгосон мэргэжил учраас шавь нарынхаа төлөө эцэг эхээс нь дутахааргүй сэтгэл гаргаж зүтгэдэг. Бяцхан шавь нараа хараад амьдралын зовлон бэрхшээлээ мартдаг юм. Ямар ч үед намайг хүүхдүүдийн маань заяа түшинэ гэж боддог.

-Саяхан болсон Эх үрсийн баяраар Сэлэнгэ аймгийн Засаг дарга Ш.Оргил та бүхний хөдөлмөрийг үнэлсэн гэж сонссон. Та ямар шагнал хүртэв?

-Амжилт гаргасан багш, шавь нарыг аймгийн Засаг дарга Ш.Оргил шагнасан. Засаг даргаас хүндэт жуух бичиг болон тус бүр сая, сая төгрөг гардан авлаа, бид. Бидэнд цаашид их ажил хийх урам зориг өгсөн. Урам хайрласан Засаг даргадаа баярлалаа.