Нийслэлийн Баянзүрх дүүргийн 11 дүгээр хорооны  иргэд “Гачууртын уулзвараас Налайх, Чойрын уулзвар хүртэл 20.9 км урт замыг шинээр тавина гэсэн шалтгаанаар Баянзүрх дүүргийн 11 дүгээр хорооны 9, 10 дугаар хэсэгт олон жил амьдарч байгаа 182 өрхөд газраа чөлөөлөх мэдэгдлийг Нийслэлийн газрын албанаас ирүүлсэн билээ.

Үүнтэй холбогдуулан тус газрын оршин суугчид “Бид оршин суугаа газартаа ногоо тарьж, хувийн аж ахуй эрхэлж ирсэн. Бидний аж ахуй газрыг дайруулахгүйгээр шинэ замаа тавих боломжтой байсаар байтал өмч хөрөнгө болон оршин суух газраа чөлөөтэй сонгох эрхэнд минь халдаж байна” гэх гомдлыг Хүний эрхийн Үндэсний Комисст өнгөрсөн тавдугаар сард хүргүүлжээ.

Тэгвэл уг гомдлын дагуу Хүний эрхийн Үндэсний Комиссоос Нийслэлийн Засаг дарга бөгөөд Улаанбаатар хотын захирагч С.Батболдод шинээр тавихаар төлөвлөж буй замыг иргэдийн эрх ашигт хохирол учруулахгүй байдлаар тавих боломжтой эсэх талаар тодруулсан байна.

Харин Нийслэлийн Авто замын хөгжлийн газраас“Баянзүрх дүүргийн товчоо орчмын 0.34-5.5 км авто зам, гүүрийн трассыг өөрчилж, иргэдийн өмч хөрөнгөд халдахгүйгээр шийдвэрлэхээр ажиллаж байна” гэх Хүний эрхийн Үндэсний Комисст өгчээ. Ингэснээр газраа  чөлөөлөх бичиг авсан 182 айлын асуудал шийдэгджээ.