“Элэг бүтэн Монгол” үндэсний хөтөлбөрийн өдөрлөгийн хүрээнд Эрүүл мэндийн яамны Төрийн нарийн бичгийн дарга Д.Очирбат  Дорноговь аймаг ажиллалаа. Энэ үеэр Халдварт өвчин судлалын үндэсний төв, Хавдар судлалын үндэсний төв, Улсын 3-р төв эмнэлэг, Геронтологийн үндэсний төв, Арьсны өвчин судлалын үндэсний төв, АШУҮИС болон "Гранд мед эмнэлэг"-ийн нарийн мэргэжлийн эмч нар иргэдэд үнэ төлбөргүй үзлэг оношилгоо хийжээ.

Үзлэгт оношилгоонд нийт 1176 иргэн хамрагдсанаас сүрьеэгийн сэжигтэй тохиолдол тав, шинээр оношилгдсон хавдрын тохиолдол 11, хавдрын дахилттай тохиолдол хоёр, хавдрын үсэрхийлэлтэй тохиолдол нэг, элэгний С вирүстэй тохиолдол 13, элэгний В вирүстэй 10 илэрчээ. Өвчний тохиолдол илэрсэн иргэдэд дээрх эмнэлгүүд болон аймгийн Нэгдсэн эмнэлгээс эмчилгээнд хамруулах юм.

Мөн өдөрлөгийн хүрээнд Дорноговь аймгийн Засаг даргын орлогч Г.Эрдэнэцэцэг Эрүүл мэндийн яамны Төрийн нарийн бичгийн дарга Д.Очирбат тэргүүтэй төлөөлөгчдийг хүлээн авч уулзсан байна. Уулзалтын үеэр "Элэг бүтэн Монгол" үндэсний хөтөлбөр болоод эрүүл мэндийн чиглэлээр аймгийн хэмжээнд хийгдэж буй ажлууд,цаашид хийж хэрэгжүүлэх ажлын талаар харилцан санал солилцжээ.