Монголын нэрийг дэлхийд гаргаж яваа томоохон аж ахуйн нэгж бол “Говь” хувьцаат компани. Олон улсын хурал, зөвлөгөөн, уулзалтын үеэр гадаадын төлөөлөгчдөд өгөх бэлгийн тэргүүнд тус компанийн ноолууран бүтээгдэхүүн л явдаг. Монгол Улсын ууган үйлдвэрийн нэг, улсын төсөвт их хэмжээний татварыг байршуулагч, 2000 гаруй хүнийг ажлын байраар хангадаг гээд дурьдаад байвал энэ компанид сайн зүйлс олон.

Гэвч өчигдөр нэгэн харамсалтай хэрэг гарч, тус компанийн дээврийн хэсэгт гал гарсан юм. Тодруулбал, Хан-Уул дүүргийн III хороонд байрлах “Говь” хувьцаат компанийн үйлдвэрийн дээвэр шатаж буй талаархи дуудлага Нийслэлийн онцгой байдлын газарт энэ сарын 14-ний 20:46 цагт иржээ.

Дуудлага хүлээн авсан даруй нийслэлийн Онцгой байдлын газрын бүх Гал түймэр унтраах, аврах анги болох 12 ангийн ээлжийн 200 шахам албан хаагч гал унтраах шуурхай албаны 35 автомашиныг дайчлан 10 гаруй цаг тасралтгүй ажилласны үр дүнд галыг бүрэн унтраалаа. Мөн Онцгой байдлын аврагчид үйлдвэрийн ажилчидтай хамтран тоног, төхөөрөмжийг галаас гаргажээ. Их хэмжээний галын улмаас хүний амь хохироогүй гэсэн багахан ч болов сэтгэл тайвшруулах баяртай мэдээ байгаа юм.

Харамсалтай үйл явдал тохиосон хэдий ч  Монголын ард түмний сэтгэл далай шиг баян гэдгийг өчигдрийн үйл явдал баталлаа. Учир нь гал унтраах үед ойролцоох үйлдвэрийн ажилчид өөр өөрсдийн хүчээр тусалж, галыг унтраахад сэтгэл зүрхээрээ нэгдсэн юм. Тухайлбал, “АПУ” компанийн ажилчид түрдэг тэргээр ус зөөж, галыг унтраалцахаар усны шугам таталцсан гэнэ.

Харин “Жүр Үр”, “Витафит”, “Монфрэш” компани болон “Pizza hut”-ийн хамт олон гал унтраахаар ажиллаж буй Онцгой байдлын албан хаагчдад нэрийн бүтээгдэхүүний дээжээсээ өгчээ. Түүнчлэн фэйсбүүк, твиттер хуудаст залуус нэгдэн үндэсний шилдэг үйлдвэр “Говь” компанид туслах аяныг хүртэл өрнүүлж байна. Энэ мэтчилэн Монголын иргэд өөрсдийн сэтгэл зүрхээрээ нэгдэж, “Говь” компанид туслахыг хүссэн комментууд сошиал ертөнцийг дүүргэв. Уг үйл явдал Монголын ард түмний зовсон цагт нэгэндээ туслан эвлэлдэн нэгдэж чаддаг мөн чанар устаж үгүй болоогүйг харууллаа.

Өөрөөр хэлбэл, улс төрийн хүчнүүд л аливаа хэргийг харлуулж, иргэдийг хагалан бутаргадаг гэдгийг баталсан үйл явдал болов. Түүнээс гадна Богд Хан ууланд гарсан түймрийг унтраахаар Онцгой байдлын алба хаагчид олон хоног нойр хоолгүй зүтгэж байгаа билээ. Тэгвэл иргэд өөрсдийн санаачилгаар Онцгой байдлын алба хаагчдад цэвэр ус, ундаа, хуушуур зэрэг хоол хүнс өгсөн сайхан мэдээ байна.

Мөн “Ландкруйзер эзэмшигч”-дийн төрийн бус байгууллагаас машинаараа ус хүргэн өгч, Богд уулын түймрийг унтраахад тусалж байгаа. Энэ мэтчилэн дурьдаад байвал нэгнээ дэмжсэн, нэгэндээ тусалсан үйл явдлууд олон бий. Сүүлийн үед залуучууд аль болох сайн сайхан зүйлд зорьж тэмүүлдэг болж.

Гэр оронгүй, ядарсан нэгнийг хэсэг залуус нэгдэж байгаад хандив цуглуулах аян өрнүүлэн дор нь амьдралыг нь өөрчилж байна. Үүнээс илүү сайхан зүйл гэж юу байхав. Улс орон даяар Ерөнхийлөгчийн сонгуулийн салхи дэгдэж, хаа сайгүй намуудын хэрүүл тасрахгүй байгаа энэ үед Монголчууд үндэсний үйлдвэрийнхээ төлөө нэгдэж байгаад харахад сэтгүүлч хүний хувьд бахархаж байлаа. Мөн урдаа барьдаг ганц үндэсний үйлдвэрээ сэтгэлээрээ дэмжихийг та бүхэнд уриалж байна.