НМХГ-аас үндэсний их баяр наадмын үеэр хүнсний үйлчилгээ үзүүлэх зөвшөөрөл олгох асуудлаар хэвлэлийн бага хурал хийлээ. Мэдээллийг НМХГ-ын дарга Л.Эрдэнэчулуун танилцуулав. Тэрбээр

 “Баяр наадам болохтой холбогдуулан  Хүй долоон худагт хуушуурын 210, худалдааны 110, Төв цэнгэлдэх хүрээлэнд хуушуурын 400, худалдааны 100 зөвшөөрлийг зориулагдсан цэгт олгохоор боллоо. Худалдааны цэгээр хүнсний бүтээгдэхүүн, ус ундаа, айраг, зайрмаг, гэрэл зургийн үйлчилгээ үзүүлэх юм. Харин хоол үйлдвэрлэл, худалдаа үйлчилгээний зөвшөөрөл хүссэн материалыг 2017 оны зургадугаар сарын 16-27-ны хооронд дүүргийн ЗДТГ-ын Хүнс, худалдаа, үйлчилгээний хэлтэс хүлээн авна.

Мөн зургадугаар сарын 28-29-ний хооронд шалгаруулалт явагдана. Шалгарсан аж ахуйн нэгжийг энэ сарын 30-нд олон нийтэд мэдээлэх болно” гэв. Мөн наадмын үеэр хүй долоон худаг болон төв цэнгэлдэх хүрээлэнд явуулын лаборатори байрлах аж. Түүнчлэн хүнс, худалдаа үйлчилгээ эрхлэх бүх газруудыг зориулалтын асар барихыг шаардаж байгаа талаар НМХГ-аас мэдээллээ.