“Эрүүл мэндийн үзүүлэлт” номын нээлт өнөөдөр боллоо. Энэхүү номд Монгол Улсын иргэдийн эрүүл мэндийн үзүүлэлтийн талаарх  мэдээллийг багтаажээ. Тухайлбал, Монгол Улсын хүн ам 2016 оны жилийн эцсийн байдлаар гурван сая 119.9 мянга болж, нийт хүн амын 68.9 хувь нь хот суурин газар, үлдсэн 31.1 хувь нь хөдөө амьдарч байгаа гэнэ. Мөн дундаж наслалт 2016 онд 69.57 болжээ. Үүнээс  эмэгтэйчүүдийн дундаж наслалт 75.10, эрэгтэйчүүдийнх 65.58 болсон аж. 2016 онд улсын хэмжээнд 77803 эх амаржсан нь 2015 онтой харьцуулахад төрөлт 2631 тохиолдлоор буюу 3.3 хувиар буурсан байна. Улсын хэмжээнд 78194 хүүхэд амьд төрсөн ба 1681 нь хоёр ихэр, 27 нь гурван ихэр хүүхэд гэнэ.

Харин хүн амын нас баралтын ерөнхий коэффициент 1990 онд 7.9 байсан бол бол 2016 онд уг үзүүлэлт 5.2 болж 1990 онтой харьцуулахад 2.7-аар буурсан үзүүлэлттэй байна.

Түүнчлэн Монгол Улсад эмнэлгийн нэг оронд ногдох хүний тоо 134, нэг их эмчид ногдох хүний тоо 309-д хүрчээ. 10000 хүн тутмын 2749 хүн давхардсан тоогоор хэвтүүлэн эмчлэх эмнэлгийн тусламж үйлчилгээг авч, жилд нэг иргэн 5.5 удаа амбулаторийн тусламж үйлчилгээ авах болжээ. Энэ мэтчилэн олон судалгааны үр дүнг номд багтаасан байна.

“Эрүүл мэндийн үзүүлэлт” номыг Англи, Монгол хэл дээр хэвлүүлэн бүх төвшний мэдээлэл хэрэглэгчид, төрийн байгууллагууд, олон улсын байгууллагууд, төрийн бус байгууллагууд, эрдэм шинжилгээний байгууллагуудын 300 гаруй мэдээлэл хэрэглэгчдэд үнэ төлбөргүйгээр түгээдэг. Уг эмхэтгэлийг мэдээлэл хэрэглэгчдэд танилцуулах, түгээх, нотолгоонд суурилсан шийдвэр гаргалтыг дэмжих зорилгоор танилцуулах уулзалтыг жил бүр зохион байгуулж УИХ, Засгийн газар, ЭМЯ, ДЭМБ, ҮСХ, нийслэлийн эрүүл мэндийн газар, төв эмнэлэг тусгай мэргэжлийн төвүүдийн удирдах ажилтнууд, төрийн бус байгууллагын 50 гаруй мэдээлэл хэрэглэгчдийг хамруулдаг  аж.