Замын цагдаагийн албаны ЖШУХ-т өчигдөр нийт 348 дуудлага иржээ. Үүнээс зам тээврийн ослын 252 дуудлага бүртгэгдсэн бөгөөд ослын улмаас зургаан хүн гэмтсэн талаар Замын цагдаагийн албанаас мэдээллээ. Мөн сүүлийн үед явган зорчигчид согтуугаар замын хөдөлгөөнд оролцож, улмаар авто тээврийн осолд өртөх нь ихэсчээ.

Тодруулбал, өчигдөр 15:00 цагийн орчимд Баянгол дүүрэгт  “Нар” хүүхдийн дэлгүүрийн хойд замд Domani автомашины жолооч Э нь хоёр явган зорчигчийг мөргөсөн хэрэг гарчээ. Явган зорчигчид 15, 16 настай хүүхдүүд бөгөөд согтууруулах ундааны зүйл хэрэглэсэн үедээ замын хөдөлгөөнд оролцсон аж.

Мөн тус дүүрэгт байрлах “Оргил” худалдааны төвийн урд замд приус маркийн автомашины жолооч Т нь явган зорчигч 37 настай Б, 25 настай А нарыг мөргөж, гэмтээсэн хэрэг Замын цагдаагийн албанд бүртгэгдсэн байна. Замын цагдаагийн албанаас мэдээлснээр А, Б нар нь согтуугаар замын хөдөлгөөнд оролцож байжээ. Тиймээс согтуугаар тээврийн хэрэгсэл жолоодох, замын хөдөлгөөнд оролцохгүй байхыг Замын цагдаагийн албанаас анхаарууллаа.