Нийслэлийн Онцгой байдлын газраас голын усны ослоос урьдчилан сэргийлэх, иргэдийн аюулгүй байдлыг хангах зорилгоор Туул гол дагуу завьт эргүүл ажиллуулж байгаа билээ.  Нийслэлийн аврах анги 105 дугаар ангийн завьт эргүүлийн бүрэлдэхүүн энэ сарын 24-нд Баянзүрх дүүргийн  20 дугаар хороонд Туул гол дагуу аялагчдад аюулгүй байдлаа хангах талаар сэрэмжлүүлж хүргэж байжээ.

Энэ үеэр гурван настай хүүхэд усанд хөл алдан урсаж байсныг шуурхай ажилласны үр дүнд уснаас аварч эцэг,  эхэд нь хүлээлгэн өгсөн байна. Тухайн үед эцэг,  эх нь голын эрэг дээр байсан ч хүүхдээ хараа хяналтгүй орхисны улмаас  ийнхүү голын усанд осолдох гэж байжээ. Тиймээс эцэг,  эхчүүдэд бага насны хүүхдийн аюулгүй байдлыг хангаж, хараа хяналттай байхыг нийслэлийн Онцгой байдлын газраас онцгойлон анхаарууллаа.