“Эрс шинэчлэл хөдөлгөөн”, “Монголын хохирогчдын холбоо”, “Нам бус иргэдийн холбоо” зэрэг иргэний нийгмийн байгууллагуудын төлөөлөл  Үндэсний мэдээллийн төвд хэвлэлийн хурал зарлаж, Ерөнхийлөгчийн сонгуулийн санал тооллоготой холбоотой шаардлагыг Сонгуулийн Ерөнхий хороонд хүргүүлж буйгаа мэдэгдлээ.

Нам бус иргэдийн холбооны тэргүүн А.Эрдэнэбаяр “Сонгууль өгсөн нь бус тоолсон нь ялдаг гэж Сталин хэлсэн байдаг. Өнгөрсөн Ерөнхийлөгчийн сонгууль яг энэ зарчмаар явагдлаа. Тиймд дахин санал хураалт биш гурван нэр дэвшигчийн дунд дахин санал хураалт явуулахыг шаардаж байна” гэлээ.

Иргэний нийгмийн байгууллагуудаас СЕХ-нд хүргүүлсэн шаардлагад  “Нэгдүгээрт, 23:00 цагийн үед С.Ганбаатар саналын дүнгээр хоёрт явж байсан. Гэтэл Баян-Өлгий, Увс аймгуудад сүлжээ алга байна гэх шалтгаанаар санал тооллогыг удааж, энэ хооронд С.Ганбаатарт 500 санал, харин М.Энхболдод 8000 санал тоологдсон байсан. Энэ асуудлыг тодруулж, санал авсан хэсгийн хороод дээр гар тооллого явуулах, хуулийн байгууллагаар шалгуулах хэрэгтэй. Хоёрдугаарт, СЕХ-ны дарга Ч.Содномцэрэн 22:00 цагт нийт санал өгсөн сонгогчдын тоог хэлснээс хойш гарч ирсэн 37 мянган үл мэдэгдэх хүмүүсийг хаанаас гаргаж ирсэн бэ. Үүнийгээ тайлбарла” гэсэн асуудлыг тусгасан байна.