Солонгосын олон улсын хамтын ажиллагааны байгууллага KOICA-гийн дэмжлэгээр Нийслэлийн ЗДТГ, Азийн сан хамтран “Бизнес эрхлэгч эмэгтэйчүүдийн төв” төслийг  жилийн өмнөөс эхлүүлсэн юм. Мөн “Хөгжлийн шийдэл” ТББ, МҮХАҮТ, “Голомт” банк хамтран  оролцож байгаа энэхүү төсөлд одоогоор 4000 гаруй бизнес эрхлэгч эмэгтэй хамрагдаж, бизнесийн ур чадвараа сайжруулан харилцаа холбоогоо өргөжүүлж чаджээ.

Энэхүү төвийн үйл ажиллагаанд нэгдсэн Улаанбаатар хотын бизнес эрхлэгч болон бизнес эрхлэх хүсэлтэй эмэгтэйчүүдэд бодит үр дүнгүүд гарсаар байна. Хамгийн гол нь тохь тухтай орчинд хэрэгцээ шаардлагадаа нийцсэн мэргэжлийн сургалтуудыг үнэ төлбөргүй авч чаддаг аж. 

Үүнээс гадна Улаанбаатар хотын бизнес эрхлэгч эмэгтэйчүүдэд зориулсан тусгай Бизнес инкубатор төвийг албан ёсоор нээгээд удаагүй байна. Нээлтийн үйл ажиллагаанд Нийслэлийн Засаг дарга бөгөөд Улаанбаатар хотын Захирагч С.Батболд мөн төслийг хэрэгжүүлэгч Азийн сангийн Монгол дахь суурин төлөөлөгч Мелони Линдберг, Монгол дахь KOICA олон улсын байгууллагын захирал Пак Сү Ён нар оролцжээ.

Бизнес эрхлэгч эмэгтэйчүүдэд зориулсан уг инкубатор төв нь хурдавчилсан дөрвөн сарын тусгай хөтөлбөр, тохилог ажлын байр болон туршилтын бүтээгдэхүүнээ хийх оёдол, гар урлал, талх нарийн боовны тоног төхөөрөмж, компьютер, хүүхдийн өрөөнөөс бүрдэж байгаа нь эмэгтэйчүүдэд өөрсдийн санаагаа бодитоор туршиж, бүтээх боломжийг олгож байна. Одоогоор тус инкубатор төвд төслийн хоёр дахь удаагийн шалгаруулалтанд амжилттай оролцсон зургаан эмэгтэй өөрсдийн бизнесээ хөгжүүлэн ажиллаж байгаа аж.