ГССҮТ-өөс осолд орсон эмч нартай холбогдуулан хэвлэлийн бага хурал хийлээ. Хэвлэлийн бага хурлын үеэр ГССҮТ-ийн захирал Т.Мөнхсайхан “Манай эмнэлэг их онцлогтой. Баяр наадам болохоор эмнэлгийн ачаалал ихэсдэг. Тиймээс бид баяр наадмын өмнө албан байгууллагаараа салхинд гарах зорилгоор Эрдэнэзуу хийд рүү явсан.

Зарим эмч нар өөрсдийнхөө машинаар гэр бүлийнхээ гишүүдийн хамт дагаж явсан юм. Харамсалтай нь буцах замдаа өөрсдийнхөө машинаар явж байсан эмч нар маань осолд орж, дунд оврын автобустай мөргөлдсөн. Тодруулбал, дунд оврын автобус урсгал сөрж манай эмч нарын сууж явсан машиныг мөргөсөн. Энэ хэрэг нь эмнэлгийн төдийгүй эмч нарт маш их хохирол учрууллаа. Нэг эмч хавсарсан хүнд гэмтэлтэй Сэхээн амьдруулах тасагт хэвтэж байна. Гурван эмч нь энгийн тасагт хэвтэн эмчлүүллээ. Нэг эмч өчигдөр мэс засалд орсон. Одоогийн байдлаар биеийн байдал нь хэвийн байна. Ямар нэгэн хүний амь нас эрсдээгүй” гэв.

Мөн тэрбээр хүнд хэцүү цагт байгууллагын зугаалганы асуудлыг улстөржүүлж, сонгуультай холбон ярьж буйд харамсаж байгаагаа илэрхийллээ.