ОБЕГ-аас улсын хэмжээнд гарч буй түймэртэй холбогдуулан мэдээлэл хийлээ. Мэдээллийн эхэнд түймэр унтраахад зориулсан хандив тусламжийн талаар мэдээллээ.  

ОБЕГ-ын тэргүүн дэд бөгөөд штабын дарга Г.Ариунбуян " Хандив тусламж үзүүлсэн нийт ард иргэд, Засгийн газар, Шадар сайдад талархал илэрхийлье. ОБЕГ-аас ой хээрийн түймрийн талаар авч хэрэгжүүлсэн арга хэмжээний талаар тодорхой мэдээлэл өгөх гэсэн юм.

Долоодугаар сар гараад нийт нутгаар хуурайшилтын зэрэг нэн аюултай төвшинд хүрсэнтэй холбоотойгоор түймэр гарах нь нэмэгдсэн. Үүнтэй холбоотойгоор манай байгууллага бүх арга хэмжээг авч байна.  Улсын онцгой комисс өчигдөр хуралдлаа. Мөн Засгийн газрын урьдчилан сэргийлэх хүрээнд хэрэгжүүлэх үйл ажиллагааны талаар үүрэг өгсөн. Өчигдөр нийт 22 түймэр гарсан. Өнөөдрийн байдлаар 21 түймэр байна. Үүнээс долоон түймрийг цурманд оруулсан. Төв аймгийн Батсүмбэр суманд гарсан түймрийг цурманд оруулаад бүрэн унтраахаар ажиллаж байна. Орон нутгийн 1000 гаруй иргэн,  80 гаруй техник хэрэгсэлтэйгээр ажиллаж байна. Зэвсэгт хүчний 300 гаруй албан хаагч 26 техник хэрэгсэлтэйгээр үүрэг гүйцэтгэж байгаа. Түймрийн эрчим буурч байгаагийн нэг шалтгаан нь үүлэнд нөлөөлөх арга хэмжээг авч эхэлсэнтэй холбоотой” гэв.

Мөн ГТТГ-ын дарга, хурандаа С.Залуухүү үүлэнд зориудаар нөлөөлж, бороо оруулсан талаар мэдээлэл өгөв. Тэрбээр  "Долоодугаар сарын 10-наас хойш баяр амралтын өдрүүд эхэлсэн. Үүнтэй холбогдуулан түймрийн эрсдэл нэлээд нэмэгдсэн. Түймэр цаашаа дэлгэрэх эрчим ч буурсан. Үлдсэн 14 түймэр өнөө шөнийн цаг агаарын байдлаас шалтгаана. Хэрвээ хур тунадас орвол цурманд оруулна гэсэн мэдээлэл ирсэн. ОБЕГ өөрийн хүлээсэн үүргийн дагуу түймрийг унтраах үйл ажиллагаанд оролцож байгаа. Хэрэв түймрийн нөхцөл байдал хүндэрвэл иргэдийг татан оролцуулна. Одоохондоо хүндрэлтэй байдалд хүрээгүй байна” гэлээ.

Түүнчлэн одоогийн байдлаар хандивын дансанд  84 иргэний 32 сая 474 мянган төгрөг цуглараад байгаа ажээ. Иргэд мөнгөн хандиваас гадна хоол хүнс, эд материалын хандив өргөж байгааг мэдээллийн үеэр онцолж байлаа.