Монгол Улсын хэмжээнд 22 түймэр гараад байгаа билээ. Түүнээс долоон түймрийг цурманд оруулсан талаар ОБЕГ-аас мэдээлсэн. Мөн түймэр тавьсан этгээдийг илрүүлэхээр цагдаагйн байгууллага ажиллаж байгаа юм.  Цагдаагийн байгууллага 2017 оны долдугаар сарын 16-ны байдлаар ой, хээрийн гал түймрийн хэрэг, зөрчлийн тухай нийтдээ 105 мэдээ, мэдээлэл хүлээн авч шалгасан байна.  Тэгвэл цагдаагийн байгууллагаас нийт шалгасан ой хээрийн 71 түймрийн эзэн холбогдогчийг тогтоон, 30.1 сая төгрөгийн хохирлыг гэм буруутай этгээдээр нь нөхөн төлүүлжээ.

Энэ төрлийн дөрвөн хэрэгт Эрүүгийн хэрэг үүсгэсэн бол 68 түймрийн зөрчлийг Эрүүгийн хэрэг үүсгэхээс татгалзсан саналтай прокурорт шилжүүлсэн, одоогийн байдлаар нийтдээ гал түймэртэй холбоотой 33 гомдол, мэдээллийг шалгаж байгаа аж. 

2017 оны эхний хагас жилийн байдлаар гал түймэртэй холбоотой хэрэг, зөрчил нь машины оч баригч, машин доор өвс хуримтлагдаж халснаас гурав, татсан тамхиа бүрэн унтраагаагүй цогтой хаяснаас долоо, аянга цахилгаанаас 18, ил задгай үнс нурмаа асгаснаас тав, гэрийн яндангаас үсэрсэн очноос гурав, хог шатааснаас гурав, гэр орондоо галын аюулгүй байдал хангаагүйгээс хоёр, галт зэвсэг хэрэглэсний улмаас нэг, ил задгай гал түлснээс болж найман түймэр гарсан болох нь тогтоогджээ.