Хөвсгөл аймгийн нэгэн үеийн залуусын үүсгэн байгуулсан “Хөвсгөл-Нэг үе” клубын 10 жилийн ойн баяр энэ өдрүүдэд Хөвсгөл аймгийн төв Мөрөн хотноо болж байгаа билээ. Хоёр өдөр үргэлжилж буй энэхүү “Нэг дэлхий-Нэг Хөвсгөл” фестивалийн үйл ажиллагаа яг одоо нийтийн бүжгээр үргэлжилж байна.

Хөвсгөл аймгийн төв талбай болох Чингүнжавын талбайд, тэр тусмаа Монгол Улсад анх удаа бүх цэргийн дуу бүжгийн чуулгын үлгэр жишээ үлээвэр найрал хөгжим бүрэн бүрэлдэхүүнээрээ тоглож, хоймор нутгийн зон олон төв талбайдаа нийтийн бүжиг бүжиж байгаа нь гадаад, дотоодын жуулчдын сонирхлыг зүй ёсоор татаж байгаа юм.

Алтан гадас, Байлдааны гавьяаны улаан тугийн одонт бүх цэргийн үлгэр жишээ үлээвэр найрал хөгжимчид анх удаа хөдөө орон нутагт ийн бүрэн бүрэлдэхүүнээрээ тоглож байгаа юм байна. Энэхүү нийтийн цэнгээнт бүжгийн дараа Чингүнжавын талбайд рок попын оддын тоглолт, шоу болох бөгөөд Хөвсгөл нутгаар овоглосон одод, залуу дуучид, мөн монголын шилдэг хамтлаг, дуучид оролцсон нүсэр шоу үүрийн 04.00 цаг хүртэл үргэлжлэх нь ээ.