Улаанбаатар хотын Замын цагдаагийн газрын ЖШУХ-т өчигдөр буюу энэ сарын 15-нд  зам тээврийн ослын  249  дуудлага бүртгэгдсэн бөгөөд нэг хүн амиа алдаж, 11 хүн хүнд хөнгөн гэмтжээ.

Тодруулбал, СБД-ийн нутаг  Дамбадаржаа руу салдаг уулзвараас зүүн тийш  “Тэнүүн огоо” ХХК-ий хойд замд  T.Prius  маркийн авто машины жолооч Д оршин суух хаяг, нэр нь тодорхойгүй 25-30 насны эрэгтэйг дайрч амийг нь хохироосон байна.

Мөн БЗД-ийн нутаг Энхтайваны өргөн чөлөө, Жуковын музейн хойд замд Д нь унадаг дугуй унаж хөдөлгөөнд оролцохдоо T.Harrier  маркийн Ө жолоочтой авто машинтай шүргэлцэж  улмаар  унадаг дугуй унаж явсан 21 настай эрэгтэй Д гэмтсэн аж.

Түүнчлэн согтуугаар тээврийн хэрэгсэл жолоодсон 49 зөрчил илэрчээ. Тиймээс Улаанбаатар хотын Замын цагдаагийн газраас замын хөдөлгөөнд анхаарал болгоомжтой оролцож, согтуугаар тээврийн хэрэгсэл жолоодохгүй байхыг санууллаа.